سہراب گوٹھ کے قریب سندھ رینجرز کا سرجیکل آپریشن، 4 دہشتگرد ہلاک

شیعہ نیوز (پاکستانی شیعہ خبر رساں ادارہ)  شہر قائد کے علاقے ناردرن بائی پاس پر سہراب گوٹھ کے قریب رینجرز سے مقابلے میں 4 دہشت گرد ہلاک، جبکہ ایک اہلکار زخمی بھی ہو گیا۔ ترجمان رینجرز کا کہنا ہے کہ وکیل حسنین بخاری کے قتل میں ملوث دہشت گردوں کی موجودگی کی اطلاع پر سہراب گوٹھ میں ایک مکان پر سرجیکل آپریشن کیا گیا، تاہم دہشتگردوں نے رینجرز اہلکاروں کو دیکھتے ہی فائرنگ کر دی، جس کے نتیجے میں ایک اہلکار زخمی ہو گیا۔ رینجرز کی جوابی کارروائی میں چار دہشتگرد ہلاک ہو گئے۔ رینجرز حکام کے مطابق دہشتگردوں نے وکیل حسنین بخاری کو چار مارچ 2015 کو ٹارگٹ کلنگ کا نشانہ بنایا تھا، جب وہ اپنے دفتر جانے کیلئے گھر سے نکل رہے تھے۔ رینجرز حکام کا کہنا ہے کہ وکیلوں، پولیس اہلکاروں، صحافیوں اور بے گناہ شہریوں کی ٹارگٹ کلنگ میں ملوث دہشت گردوں کے خلاف مہم شروع کر رکھی ہے۔ اس کے علاوہ عزیز آباد کے علاقے میں بھی رینجرز نے سرچ آپریشن کیا اور گھر گھر تلاشی لی۔