پاراچنار، حلقہ این اے 46 کرم 2 سے سابق ایم این اے ساجد طوری کامیاب
شیعہ نیوز(پاکستانی شیعہ خبر رساں ادارہ)پاراچنار حلقہ این اے 46 سے کل دو درجن کے قریب امیدوار میدان میں تھے۔ جن میں سے 6 امیدوار (ابرار جان طوری، سید اقبال، سید ارشاد، ساجد طوری، محمد حسین طوری اور علی بیگم) کی پوزیشن بہتر بتائی جا رہی تھی، تاہم اصل مقابلہ اول الذکر 4 افراد کے درمیان ہوا۔ الیکشن کمیشن کی جانب سے جاری کئے گئے غیر حتمی نتائج کے مطابق سابق ایم این اے اور پی پی پی کے امیدوار ساجد حسین طوری 21 ہزار چار سو ووٹ لیکر کامیاب قرار پائے ہیں، جبکہ انکے قریب ترین حریف اور پی ٹی آئی کے نامزد امیدوار سید اقبال میاں نے 19 ہزار اور کچھ ووٹ لیکر دوسری پوزیشن حاصل کرلی۔ 18 ہزار اور کچھ ووٹوں کے ساتھ آزاد امیدوار سابق آئی جی پولیس سید ارشاد حسین تیسری جبکہ 17 ہزار اور کچھ ووٹوں کے ساتھ آزاد امیدوار ابرار جان طوری چوتھے نمبر پر رہے۔ خیال رہے ساجد حسین طوری نے اس حلقے سے تیسری مرتبہ قومی اسمبلی کی سیٹ جیت کر ہیٹ ٹرک کرلی ہے۔
