رواں سال دہشتگردی کے واقعات میں 72 فیصد اور ٹارگٹ کلنگ میں 91 فیصد کمی ہوئی، سندھ رینجرز

شیعہ نیوز ( پاکستانی شیعہ خبر رساں ادارہ ) سندھ رینجرز نے سال 2016ء کی کارکردگی رپورٹ جاری کر دی ہے، جس کے مطابق دہشت گردی کے واقعات میں 72 فیصد اور ٹارگٹ کلنگ میں 91 فیصد تک کمی واقع ہوئی ہے۔ تفصیلات کے مطابق پاکستان رینجرز سندھ نے سال 2016ء کی کارکردگی رپورٹ جاری کر دی، جس میں بتایا گیا ہے کہ رینجرز نے سال 2016ء میں ایک ہزار 992 آپریشن کیے، جن میں 2 ہزار 847 گرفتاریاں ہوئیں، جبکہ آپریشنز کے دوران 350 دہشت گرد اور 446 ٹارگٹ کلرز کو بھی گرفتار کیا گیا۔ رپورٹ میں بتایا گیا ہےکہ سال 2016ء میں گرفتار ہونے والے 87 ٹارگٹ کلرز کا تعلق لیاری گینگ وار، 348 کا سیاسی جماعتوں کے عسکری ونگ، جبکہ 11 کا مذہبی جماعتوں سے ہے۔ رینجرز رپورٹ کے مطابق رواں سال کارروائیوں کے دوران ایک ہزار 845 مختلف اقسام کا اسلحہ اور ایک لاکھ 94 ہزار سے زائد مختلف اقسام کی گولیاں بھی برآمد کی گئیں، جبکہ رواں سال رینجرز کی جانب سے 13 مغویوں کو بھی بازیاب کرایا گیا اور کارروائی کے دوران دہشت گردوں کی فائرنگ سے 5 رینجرز اہلکار بھی زخمی ہوئے۔ رپورٹ میں دہشت گردی اور ٹارگٹ کلنگ سے متعلق بتایا گیا ہے کہ رواں سال دہشت گردی کے واقعات میں 72 فیصد، ٹارگٹ کلنگ میں 91 فیصد، بھتہ خوری میں 93 فیصد، جبکہ اغوا برائے تاوان کی وارداتوں میں 86 فیصد کمی واقع ہوئی ہے۔