پشاور، کوچہ رسالدار میں واقع پاک ہوٹل میں خودکش دھماکہ، 9 افراد شہید، 50 سے زائد زخمی

شیعہ نیوز (پشاور) پشاور کے علاقے کوچہ رسالدار میں واقع پاک ہوٹل میں بم دھماکہ ہوا ہے، جس کے نتیجے میں 9 افراد شہید جبکہ خواتین اور بچوں سمیت 50 سے زائد زخمی ہوگئے۔ ذرائع کے مطابق قصہ خوانی بازار کی پشت پر واقع علاقہ کوچہ رسالدار میں  امام بارگاہ کے  قریب ایک ہوٹل میں دھماکہ ہوا ۔ جس کے نتیجے میں 9 افراد شہید اور 50 سے زائد خمی ہوگئے ہیں۔ دھماکے سے ہر جانب دھواں ہی دھواں پھیل گیا جبکہ دھماکہ ہوتے ہی پورا علاقہ اندھیرے میں ڈوب گیا۔ ریسکیو ٹیمیں زخمیوں اور نعشوں کو اسپتال پہنچانے اور ملبے سے زخمیوں کو ڈھونڈنے میں مصروف ہیں۔ پولیس اور سکیورٹی فورسز نے پورے علاقے کو گھیرے میں لے لیا ۔ ذرائع کے مطابق پاک ہوٹل بری طرح تباہ ہوگیا ہے۔ واضح رہے کہ تین سال قبل بھی کالعدم جماعت کے شدت پسند  دہشتگردوں نے اس ہوٹل کو بارود سے بھری گاڑی کے ذریعے نشانہ بنایا تھا، اس ہوٹل میں زیادہ تر پارا چنار سے تعلق رکھنے والے اہل تشیع  افراد رہائش اختیار کرتے ہیں۔
سپرنٹینڈنٹ پولیس پشاور فیصل مختار نے بھی دھماکے میں ہلاکتوں کی تصدیق کرتے ہوئے کہا کہ یہ ایک خودکش حملہ تھا۔ لیڈی ریڈنگ ہسپتال کے میڈیا کوارڈینیٹر جمیل شاہ کا کہنا ہے کہ ہسپتال میں اب تک چھ لاشوں کو منتقل کیا جاچکا ہے جبکہ 32 افراد زیر علاج ہیں۔ ان کا کہنا تھا کہ زخمیوں میں خواتین اور بچے بھی شامل ہیں۔