پیغمبر اعظم ۖ کی اہانت میں اسرائیل اور امریکہ کا ہاتھ ہے، علامہ عبدالخالق اسدی

شیعہ نیوز (لاہور) مجلس وحدت مسلمین پنجاب کے سیکرٹری جنرل علامہ عبدالخالق اسدی نے لاہور میں پنجاب کے ضلعی سیکرٹریز کے اجلاس سے خطاب کرتے ہوئے کہا کہ طالبان کے خلاف آپریشن اس وقت تک مثبت نتائج نہیں دے سکے گا جب تک شہروں اور دیہاتوں میں چھپے وائٹ کالر طالبان کے خلاف آپریشن نہیں کیا جاتا، امید ہے کہ پاک فوج ان وائٹ کالر طالبان کے خلاف بھی آپریشن کرے گی، جنہوں نے عسکری طالبان کی معیشت کو مضبوط کیا ہوا ہے، پھانسی لگنے والے دہشتگردوں کی نماز جنازہ میں جو ہجوم جوش و خروش سے شریک ہوتا ہے، ان سب پر نظر رکھی جائے، یہ سارے پوٹینشل دہشت گرد ہیں۔

انہوں نے کہا کہ مغرب کی جانب سے پیغمبر اعظم ۖ کی اہانت میں صیہونی ریاست اسرائیل اور امریکہ کا ہاتھ ہے، مسلمان ممالک کو دو ٹوک الفاظ میں اس مغربی گستاخی پر جواب دینا ہوگا، مغرب صیہونیت کے ایما پر مسلمانوں کیخلاف محاذ کھولنے میں مصروف ہے، انسانیت کے قاتل درندے داعش اور طالبان کے قبیح کارناموں کو مسلمان معاشرے سے جوڑنا دراصل دیگر اقوام کو اسلام سے دور کرنے کی سازش ہے، صیہونیت اور مغرب اسلامی بیداری سے خوفزدہ ہے۔ انہوں نے کہا کہ امت کے لئے افسوس کا مقام یہ ہے کہ ہمارے مسلم حکمران خصوصاً عرب حکمران انہی اسلام دشمن طاقتوں کے تابع ہیں، اگر آج عرب اور دیگر مسلم ممالک کے حکمران مغربی ممالک سے اپنا سرمایہ نکال لیں تو یہ دشمن دنوں میں زمین بوس ہوجائینگے، لیکن بدقسمتی سے ہمارے مسلمان حکمران ان کے غلام بنے ہوئے ہیں۔