آئی ایس او ڈیرہ ڈویژن کا 2 روزہ مرکزی کنونشن، تیمور رضا نئے میر کارواں منتخب
شیعہ نیوز ( پاکستانی شیعہ خبر رساں ادارہ) امامیہ اسٹوڈنٹس آرگنائزیشن ڈیرہ اسماعیل خان ڈویژن کا 40واں سالانہ ولایت نور ہدایت مرکزی کنونشن بروز ہفتہ حاجی مورہ میں شروع ہوا۔ کنونشن میں مرکزی کابینہ کے عہدیدران کے علاوہ ڈیرہ اسماعیل خان ڈویژن کے تمام یونٹس سے نمائندگان نے شرکت کی، اور اپنی سالانہ کارکردگی کی رپورٹ پیش کی۔ کنونشن کے دوران مختلف تربیتی پروگرامز کا بھی انعقاد کیا گیا۔ شب ہفتہ کو "شب شہداء” کے نام سے منایا گیا، جس میں راہ حق میں شہید ہونے والوں کو خراج تحسین پیش کیا گیا، شب شہداء میں علامہ سبطین علوی نے خطاب کیا جبکہ مقامی نوحہ خوان پارٹیوں نے نوحہ خوانی کی۔ کنونشن کے دوسرے روز ڈویژنل کابینہ نے اپنی سالانہ کارکردگی کی رپورٹ پیش کی۔ اس روز "نوجوان امیدِ پاکستان” سیمینار منعقد کیا گیا، جس میں علامہ نصیر الحسن رجائی اور علامہ سبطین علوی نے خطاب کیا۔ نماز باجماعت کے بعد ڈویژنل صدر کا انتخاب عمل میں لایا گیا، جس میں برادر تیمور رضا کو نیا میرکارواں منتخب کیا گیا۔ کنونشن کے دوران اسٹیج سیکرٹری کے فرائض آغا ثقلین حیدر نے انجام دیئے۔ 40ویں سالانہ ولایت نور ہدایت کنونشن کے تمام انتظامات آئی ایس او حاجی مورہ یونٹ کی طرف سے کئے گئے۔
