ملٹری پولیس اور رینجرز پر حملہ کرنیوالے دہشتگردوں کو گرفتار کرلیا، آئی جی سندھ

شیعہ نیوز (پاکستانی شیعہ خبر رساں ادارہ) آئی جی سندھ غلام حیدر جمالی نے کہا ہے کہ پولیس نے رینجرز اور ملٹری پولیس پر حملہ کرنے والے دہشتگردوں کو پکڑ لیا ہے۔ تفصیلات کے مطابق گورنر ہاؤس کراچی میں وزیراعظم نواز شریف کی سربراہی میں امن و امان سے متعلق اعلیٰ سطح کا اجلاس ہوا، جس میں آرمی چیف جنرل راحیل شریف، ڈی جی آئی ایس آئی لیفٹیننٹ جنرل رضوان اختر، کور کمانڈر کراچی لیفٹیننٹ جنرل نوید مختار، ڈی جی رینجرز سندھ میجر جنرل بلال اکبر، گورنر سندھ ڈاکٹر عشرت العباد، وزیراعلیٰ سندھ سید قائم علی شاہ، وزیر دفاع خواجہ آصف، وفاقی وزیر داخلہ چوہدری نثار علی خان سمیت دیگر نے شرکت کی۔ اجلاس کے دوران آئی جی سندھ نے بتایا کہ پولیس کی جانب سے جرائم پیشہ افراد، ٹارگٹ کلرز اور دہشت گردوں کے خلاف بھرپور کارروائیاں کی جا رہی ہیں، پولیس نے رینجرز اور ملٹری پولیس پر حملہ کرنے والے دہشتگردوں کو پکڑ لیا ہے۔ انہوں نے بتایا کہ شہر کی انسداد دہشت گردی کی خصوصی عدالتوں میں 2 ہزار 688 مقدمات زیرِ سماعت ہیں، عدالتوں نے 66 پر فیصلہ سنایا ہے، جن میں 30 مجرموں کو سزا ہوئی۔