انسانی حقوق کی عالمی تنظیموں شیخ نمر کی شہادت پر صدائے احتجاج بلند کریں، علامہ عارف واحدی

شیعہ نیوز (پاکستانی شیعہ خبر رساں ادارہ) سیکرٹری جنرل شیعہ علماء کونسل علامہ عارف حسین واحدی نے کہا ہے کہ عالمی شہرت یافتہ ممتاز مذہبی سکالر اور سعودی عرب کے نامور عالم دین آیت اللہ شیخ نمر باقر النمر کو پھانسی دے دی گئی جس کی شدید الفاظ میں مذمت کرتے ہیں۔ 2011 ء میں ملک کے مشرقی صوبے میں حکومت مخالف مظاہروں کی حمایت میں آواز بلند کرنے پر سعودی عرب کی حکومت ان سے نالاں تھی۔ دو سال قبل بھی جب ان پر گولی چلائی گئی اور انہیں گرفتار کیا گیا تو سعودی عرب میں کئی دنوں تک کشیدگی رہی۔ اس وقت اسلامیان عالم سمیت اسلامیان پاکستان میں عالم اسلام کی برجستہ شخصیت آیت اللہ نمر باقر النمر کو دی جانیوالی سزائے موت پر گہری تشویش اور غم و غصے کی لہر دوڑ گئی کیونکہ شیخ باقر باصلاحیت، صاحب علم و دانش اور ممتاز عالم دین تھے ان کی خدمات قابل قدر ہیں جنہوں نے ہمیشہ اتحاد امت کیلئے خدمات انجام دیں۔ کسی بھی معاملے پر مختلف نکتہ نگاہ یا اختلاف رائے جمہوری حق ہے یہ معاملہ ایسا نہیں تھا کہ جو ناقابل برادشت ہو اس لئے مفاہمت کی پالیسی اپناتے ہوئے سعودی حکومت اپنے فیصلے پر نظر ثانی کرتی اور سزائے موت کو معطل کیا جاتا تو قرین انصاف تھا کیونکہ اس اقدام سے امہ میں اضطراب و بے چینی پھیل گئی ہے۔

ملی یکجہتی کونسل پاکستان کے مرکزی رہنما علامہ سید ساجد علی نقوی کی ہدایت پر شیعہ علماء کونسل پاکستان اس دردناک، ظالمانہ اقدام اور مظلومانہ شہادت پر ’’تین روزہ سوگ اور احتجاج‘‘ کا اعلان کرتی ہے اور آنے والے جمعۃ المبارک کو بھرپور ملک گیر یوم احتجاج کا اعلان کرتی ہے اور آیت اللہ شیخ نمرباقر النمر کو دی جانیوالی سزائے موت کو افسوسناک قرار دیتے ہوئے اسلامی سربراہی کانفرنس (او ائی سی) سمیت اقوام متحدہ، ایمنسٹی انٹرنیشنل اورانسانی حقوق کی دیگر عالمی تنظیموں سے اپیل کرتی ہے کہ ہے کہ وہ اس حساس اور سنگین معاملے پرصدائے احتجاج بلند کریں کیونکہ اپنے حقوق کی خاطر جمہوری انداز میں احتجاج کرنا کسی بھی شہری کا حق ہے اس معاملے پراس کی زندگی کے خاتمے کا فرمان جاری کرتے ہوئے تختہ دار پر لٹکادینا نتہائی افسوسناک اور قابل مذمت ہے۔

یہ سانحہ عالم اسلام کے لئے رنج و غم کا باعث ہے اور ہم سمجھتے ہیں کہ یہ ظالمانہ اقدام ایک مکتبہ فکر کو نشانہ بنانے کے مترادف ہے کیونکہ جمہوری انداز میں احتجاج کرنے سے نہیں بلکہ ایک طبقہ کو دیوار سے لگانے سے نفاق پیدا ہونے کے خدشات بڑھتے ہیں ایسے غیر دانشمندانہ اور غیر منصفانہ اقدامات کی بجائے مفاہمتی پالیسی اپنا کر معاملات کو حل کیا جانا زیادہ موزوں و مناسب ہوتا۔ پریس کانفرنس میں  عارف حسین واحدی مرکزی سیکریٹری جنرل شیعہ علماء کونسل پاکستان، علامہ سید محمد سبطین سبزواری صدر شیعہ علماء کونسل پنجاب، علامہ سید مشتاق حسین ہمدانی صوبائی جنرل سیکریٹری شیعہ علماء کونسل پنجاب، علامہ قاسم جعفری ڈویژنل صدر شیعہ علماء کونسل راولپنڈی، علامہ نصیر حسین موسوی صدر شیعہ علماء کونسل راولپنڈی شریک تھے۔