ذہنیت تبدیل کرکے ہی دہشت گردی کا مکمل خاتمہ ہو سکتا ہے، رانا ثنااللہ

شیعہ نیوز (پاکستانی شیعہ خبر رساں ادارہ )وزیر قانون پنجاب رانا ثناءاللہ خان نے کہا ہے کہ دہشت گردی فول پروف سکیورٹی انتظامات میں بھی ہو جاتی ہے اس لئے ہمیں تکفیری دہشت گردوں کے مائنڈ سیٹ کو ختم کرنا ہو گا پھر ہی دہشت گردی کا مکمل خاتمہ ہوگا۔

پنجاب اسمبلی کے باہرمیڈیا سے بات کرتے ہوئے رانا ثناءاللہ نے کہا کہ سانحہ گلشن پارک میں بے گناہ اور معصوم خواتین اور بچوں کو نشانہ بنایا گیا ہے ، ہم ایسے انسانیت دشمن تکفیری دہشتگردوں کو کسی بھی صورت معاف نہیں کریں گے اور جو لوگ دہشت گردی کے لئے تکفیری دہشت گردوں کی سہولت کاری کی سہولت کاری کرتے ہیں ان کو بھی ان کے انجام تک پہنچائیں گے۔ وزیرقانون نے کہا کہ پنجاب میں کوئی نوگوایریا تکفیری دہشت گردوں کا ٹریننگ کیمپ نہیں اگر کسی کے پاس کوئی ثبوت ہیں اور وہ کسی کے سامنے نہیں بتاسکتا تو صرف ہمارے کان میں ہی بتا دے ہم ضرورآپریشن کریں گے لیکن بغیر ثبوت کے منفی باتیں نہیں ہونی چاہیے۔

رانا ثناء اللہ کا کہنا تھا کہ فورسز نے تو وزیرستان اور دیگرعلاقوں سے بھی نوگو ایریا ختم کر دیئے ہیں، جہاں بھی تکفیری دہشت گرد ہوں گے ان کے خلاف ہر صورت آپریشن کیا جائے گا۔ حکومت تکفیری دہشت گردوں اور انکے سہولت کاروں کے خلاف نیشنل ایکشن پلان کے تحت کارروائیاں کررہی ہے، جس کے تحت اب تک سینکڑوں تکفیری دہشت گرد واصلِ جہنم اور ہزاروں گرفتارہوچکے ہیں ۔

رانا ثنا اللہ نے کہا کہ رمضان شوگرمل سے کوئی را کا ایجنٹ یا بھارتی گرفتارہوا ہے، ان کے پاس اس حوالے سے کوئی معلومات نہیں لیکن کوئی بھی پاکستانی دہشت گرد یا بھارتی ایجنٹ نہیں ہو سکتا، دہشت گردی فول پروف سکیورٹی انتظامات میں بھی ہو جاتی ہے۔ ہمیں تکفیری دہشت گردوں کے مائنڈ سیٹ کو ختم کرنا ہو گا پھر ہی دہشت گردی کا مکمل خاتمہ ہو گا