ادارہ التنزیل کے زیراہتمام سالانہ طفلان مسلم تربیتی ورکشاپ لاہور میں ہوگی

شیعہ نیوز (پاکستانی شیعہ خبر رساں ادارہ) ادارہ التنزیل کے زیر اہتمام سالانہ طفلان مسلم تربیتی ورکشاپ لاہور میں ہوگی، جس میں لاہور و مضافات سے سینکڑوں طلباء و طالبات شریک ہوں گے۔ ان خیالات کا اظہار ادارہ التنزیل کے مسئول مولانا سجاد نقوی نے لاہور میں میڈیا سے گفتگو کرتے ہوئے کیا۔ انہوں نے کہا کہ ادارہ کے زیراہتمام گزشتہ سال کی طرح امسال بھی ماہ جولائی سے گلگت، اسکردو، کراچی سمیت لاہور میں چوتھی سالانہ تربیتی، فکری اور تفریحی طفلان مسلم ورکشاپ منعقد ہوگی۔ ورکشاپ کے انعقاد کا مقصد نوجوان نسل کی عصری تقاضوں کے مطابق تربیت کرنا ہے تاکہ معاشرہ میں اپنا کلیدی کردار ادا کر سکیں۔ مولانا سجاد نقوی نے ورکشاپ کی تفصیلات سے آگاہ کرتے ہوئے بتایا کہ 15 روزہ ورکشاپ میں ثقافتی سرگرمیوں سمیت قرآن، تجوید، حدیث، عقائد، مہدویت، اخلاق، احکام، تاریخ و سیرت معصومین، حالات، کیرئیر گائیڈنس اور شیعہ شناسی کے موضوعات پر علماء کرام کے خصوصی دروس ہوں گے۔ علامہ سجاد نقوی کا کہنا تھا کہ نئی نسل کی جدید دور کے تقاضوں کے مطابق دینی، اخلاقی اقدار سے روشناس کروانا ہم سب کی اہم ذمہ داری ہے۔