لاہور سمیت ملک بھر کے ریلوے اسٹیشنز اور ٹرینوں کی سکیورٹی سخت کر دی گئی

شیعہ نیوز ( پاکستانی شیعہ خبر رساں ادارہ)پاکستان ریلویز نے ملک بھر میں موجود ریلوے سٹیشنوں کی سکیورٹی کو مزید بہتر بنانے کیلئے ترجیحی بنیادوں پر اقدامات کئے ہیں۔ ریلوے حکام کے مطابق ریلوے سٹیشنوں پر پولیس کی نفری میں اضافہ کرنے کے علاوہ سامان کی چیکنگ کیلئے سکینر مشینیں نصب کی گئی ہیں جبکہ ملک بھر میں موجود ریلوے سٹیشنوں پر کلوز سرکٹ کیمرے نصب کرنے کے منصوبے پر مرحلہ وار کام کیا جا رہا ہے۔

زرائع کے مطابق کراچی، لاہور، راولپنڈی، روہڑی، پشاور ریلوے سٹیشنوں پر کیمرے نصب کر دیئے گئے ہیں جبکہ مزید ریلوے سٹیشنوں پر کلوز سرکٹ کیمرے نصب کئے جا رہے ہیں۔ دریں اثناء ریل گاڑیوں اور ریلوے ٹریکس کی سکیورٹی بھی مزید سخت کر دی گئی ہے اور ریل گاڑیوں میں پولیس کے علاوہ کمانڈوز کو بھی تعینات کیا گیا ہے اور ریلوے ٹریکس کی بھی 24 گھنٹے نگرانی کی جا رہی ہے۔ ریلوے حکام کے مطابق مسافروں کی حفاظت کو یقینی بنانے کیلئے یہ اقدامات ترجیحی بنیاد پر کئے جا رہے ہیں۔