بلوچستان حکومت اور وفاقی وزیر داخلہ زائرین کے قافلوں کو فول پروف سکیورٹی فراہم کریں، علامہ ناظر تقوی

شیعہ نیوز(پاکستانی خبر رساں ادارہ)شیعہ علماء کونسل سندھ کے صدر علامہ سید ناظر عباس تقوی کا کہنا ہے کہ گذشتہ کئی سالوں سے صوبہ بلوچستان مختلف حوالوں سے پاکستان کا حساس ترین صوبہ بنا ہوا ہے، جس میں متعدد بار دہشتگردی کے واقعات وقوع پذیر ہوئے ہیں، جس میں سینکڑوں قیمتی جانوں کا نقصان ہوا ہے اور یہ سلسلہ تاحال جاری و ساری ہے، حکومتِ بلوچستان اور سکیورٹی ادارے بلوچستان میں دہشتگردی کو روکنے میں ناکام نظر آتے ہے، بلکہ اب تو نوبت یہاں تک آپہنچی ہے کہ خود سکیورٹی فورسز کے ادارے دہشتگردی کے نشانے پر ہیں، ایسی احساس صوتحال میں ہزاروں زائرین امام حسینؑ سڑکوں پر سراپا احتجاج بنے ہوئے ہیں اور کوئٹہ و تفتان سرحد پر کھلے آسمان تلے بیٹھے ہوئے ہیں۔ اپنے ایک بیان میں علامہ ناظر تقوی نے مزید کہا کہ سکیورٹی فورسز ہزاروں زائرین کو سکیورٹی فراہم کرنے کے بجائے صرف جھوٹی تسلیاں دے رہی ہے، ہم حکومت بلوچستان اور وفاقی وزیر داخلہ سے پُرزور مطالبہ کرتے ہیں کہ زائرین کے قافلوں کو اور زائرین کو جو سرحد پر موجود ہیں، انہیں فول پروف سکیورٹی دی جائے اور ان کو سہولیات فراہم کرنے کیلئے ہنگامی بنیادوں پر اقدام کئے جائیں۔ انہوں نے کہا کہ اگر زائرین کے ساتھ کوئی ناخوشگوار واقعہ پیش آیا، تو اس کی ساری ذمہ داری حکومت بلوچستان اور وفاقی وزیر داخلہ پر ہوگی۔ انہوں نے کہا کہ شیعہ علماء کونسل سندھ کی جانب سے بروز جمعہ بتاریخ 3 نومبر کو سندھ بھر میں زائرین امام حسینؑ کو حکومت بلوچستان کی جانب سے سکیورٹی فراہم نہ کرنے کے خلاف پُرامن احتجاجی مظاہرے منعقد کئے جائیں گے۔