مستقبل قریب میں پاکستان کی سیاست میں غیر معمولی تبدیلیاں منظر عام پر آئینگی، علامہ ناصر عباس

شیعہ نیوز(پاکستانی شیعہ خبر رساں ادارہ )مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کہا ہے کہ امت مسلمہ کے مختلف مکاتب فکر کو مزید گروہ بندی کا شکار کرنے کے لئے اسلام دشمن طاقتیں بڑی تیزی سے اپنے مذموم ہتھکنڈوں میں مصروف ہیں۔ اس وقت یہود و نصاریٰ کا واحد ہدف اسلام کی حقیقی شناخت کو گمراہ کن انداز میں پیش کرکے امت مسلمہ کو شکوک و شبہات میں مبتلا کرنا ہے، جو قوم اپنے عقیدے کے اعتبار سے شکوک کا شکار ہو جاتی ہے، اس کا ایمان کمزور پڑ جاتا ہے۔ امت مسلمہ کے ایمان کو کمزور کرنے کے لئے مختلف محاذوں پر پوری قوت سے کام جاری ہے۔ غیر ملکی ثقافتی یلغار اور ایسے تربیت یافتہ مبلغین جو اسلام کی بنیادی تعلیمات سے دور کرنے کے لئے مختلف جواز فراہم کر رہے ہیں، استعماری طاقتوں کے کاری ہتھیار ہیں۔ ایسی نام نہاد مذہبی شخصیات جو عقیدت کی آڑ میں عقیدے کو نشانہ بنانے کے ایجنڈے پر کام کر رہی ہیں، ان کی حوصلہ شکنی دور عصر کا اہم تقاضہ اور ہمارا اولین فریضہ ہے۔

علامہ ناصر عباس نے کہا کہ تعجیل امام زمانہ علیہ السلام کے لئے زمینہ سازی انفرادی کردار سازی سے مشروط ہے۔ اس کے لئے ہر ایک کو اپنا اپنا کردارا ادا کرنے کی ضرورت ہے۔ آل سعود نے عالمی ذرائع ابلاغ میں واضح طور پر کہا ہے کہ ہم امام مہدی علیہ السلام کی فوج سے جنگ کریں گے۔ سابق وزیراعظم نواز شریف آل سعود کے فکری، نظریاتی اور دیگر اعتبار سے مکمل حمایتی ہیں۔ پاکستان میں ملت تشیع کو اسی وجہ سے مشکلات کا شکار بنایا جایا رہا ہے۔ مستقبل قریب میں پاکستان کی سیاست میں غیر معمولی تبدیلیاں منظر عام پر آئیں گی۔ نواز شریف اینڈ کمپنی نے اس ملک کو نہ صرف عدم استحکام کا شکار کیا بلکہ فرقہ واریت کے فروغ میں بھی بھرپور کردار ادا کیا ہے۔ ہم اس ملک میں اتحاد و اخوت کے خواہاں ہیں۔ ہماری طرف سے ہر اس طاقت کی کھل کر مخالفت کی جائے گی، جو ملکی و قومی سلامتی کے منافی سرگرمیوں میں ملوث رہی ہو۔ انہوں نے کہا کہ 2018ء کے انتخابات ملک کی سیاست کا رخ بدل دیں گے۔ ملت تشیع کو سیاسی اعتبار سے اپنے آپ کو مضبوط کرنے کے لئے سیاست میں بھرپور کردار ادا کرنا ہوگا۔