گوجرانوالہ میں سی ٹی ڈی کی کارروائی، 5 تکفیری دہشتگرد گرفتار
شیعہ نیوز (پاکستانی شیعہ خبر رساں ادارہ) گوجرنوالہ میں سی ٹی ڈی پنجاب اور حساس ادارے نے دہشت گردوں کی موجودگی کی خفیہ اطلاع پر آپریشن کیا، جس کے نتیجے میں عالمی دہشت گرد تنظیم القاعدہ کے 5 دہشت گردوں کو گرفتار کر لیا گیا۔
ترجمان سی ٹی ڈی کے مطابق گرفتار دہشت گردوں کا تعلق عالمی دہشت گرد تنظیم القاعدہ ہندوستانی برصغیر نیٹ ورک سے ہے، جبکہ ان کے قبضے سے لیپ ٹاپ اور کمپیوٹر میں خفیہ اعداد و شمار، موبائل فون، 5 کلاشنکوف رائفلیں، 2 پستول اور گولہ بارود سمیت دہشت گردی کی مالی اعانت کے لئے فنڈز برآمد ہوئے ہیں۔
ترجمان سی ٹی ڈی کے مطابق مشترکہ ٹیم پچھلے کئی مہینوں سے اس نیٹ ورک کے بارے میں معلومات اکٹھی کر رہی تھی۔ دہشت گردعالمی دہشت گردتنظیم القاعدہ کا میڈیا سیل چلا رہے تھے اور افغانستان میں دہشت گردوں کی مرکزی قیادت کو فنڈز بھی بھیج رہے تھے۔
ترجمان کا کہنا ہے کہ گرفتار دہشت گرد گجرانوالہ میں ایل ای اے کے اہلکاروں پر حملے کرنے کا بھی منصوبہ بنا رہے تھے جبکہ ان کے خلاف تھانہ سی ٹی ڈی گجرانوالہ میں مقدمہ درج کر لیا گیا ہے۔
ترجمان سی ٹی ڈی کے مطابق گرفتار دہشت گردوں میں عاصم اکبر عرف جعفر عرف بزورگ میڈیا کا ماہر ہے جو میڈیا اور پرنٹنگ پریس چلا رہا تھا، جبکہ عبداللہ عمیر عرف ہنزلہ کارروائیوں کے لئے مجموعی طور پر کوآرڈینیٹر تھا، دیگر دہشت گردوں میں احمد عرف قاسم، محمد یوسف، محمد یعقوب عرف گورا شامل ہے۔
