محرم کی آمد، آئی ایس او کراچی کے وفد کی علماء کرام سے ملاقاتیں

شیعہ نیوز:محرم الحرام کی آمد کے موقع پر امامیہ اسٹوڈنٹس آرگنائزیشن پاکستان کراچی ڈویژن کے وفد کی ڈویژنل صدر محمد دیباج عابدی کی سربراہی میں شہر بھر میں علماء کرام سے ملاقاتوں کا سلسلہ جاری ہے۔ تفصیلات کے مطابق آئی ایس او رہنماؤں نے وائس چیئرمین مجلس وحدت مسلمین علامہ احمد اقبال رضوی، مولانا کاظم عباس نقوی، مولانا حیدر عباس عابدی سے ان کی رہائشگاہ پر ملاقاتیں کیں۔ ملاقات کے موقع پر ایام عزا میں کراچی بھر میں منعقد ہونے والی مجالس عزا، تعلیمی اداروں میں یوم حسین (ع) کا انعقاد، نماز دوران مرکزی جلوس اور خصوصا قومی مسائل کے حوالے سے گفتگو کی گئی۔ اس موقع پر علماء کرام نے آئی ایس او کی جانب سے سال بھر کی جانے والی تعلیمی کاوشوں کو سرہاتے ہوئے آئی ایس او کے ساتھ اپنے پورے تعاون کی یقین دہانی کروائی۔ آئی ایس او وفد میں ڈویژن صدر محمد دیباج عابدی، نائب صدر مصطفی رئیسی، جنرل سیکریٹری ظفر حیدر، محمد حیدر نقوی اطلاعات سیکریٹری، انچارج پروفیشنل ادارہ جات مزمل حسین، انچارج محبین سلمان رضا شامل تھے۔