دیامر میں شدت پسندوں کیخلاف آپریشن کے سوا کوئی چارہ نہیں رہا، آغا سید راحت الحسینی

گلگت کی مرکزی امامیہ جامع مسجد کے امام جمعہ والجماعت اور جی بی کے نامور عالم دین علامہ آغا سید راحت حسین الحسینی نے چلاس میں غیر ملکی سیاحوں کے بہیمانہ قتل کی پر زور الفاظ میں مذمت کی ہے۔ انہوں نے کہا ہے کہ اگر حکومت اور سکیورٹی ادارے سانحہ کوہستان، سانحہ لولوسر اور سانحہ چلاس کے فوری بعد دیامر میں موجود شرپسندوں کیخلاف آپریشن کرتے تو آج یہ دالخراش واقعہ پیش نہ آتا، اگر حکومت نے اب بھی دہشت گردوں کے خلاف آپریشن نہیں کیا تو دہشت گرد اس سے بھی زیادہ مضبوط ہونگے۔ علامہ سید راحت حسین الحسینی کا مزید کہنا تھا کہ چیف سیکرٹری اور آئی جی کو معطل کرنا کافی نہیں ہے، بلکہ جلد از جلد چلاس، کوہستان اور دیامر میں فوجی آپریشن کیا جائے اور مذکورہ علاقوں میں موجود خطرناک دہشت گردوں کے خفیہ ٹھکانوں کا قلع قمع کرکے اس جنت نظیر خطے کو مزید تباہی سے بچایا جائے۔