افغانستان: ٹنل میں دھماکہ ، 100 افراد جاں بحق و زخمی

شیعہ نیوز (پاکستانی شیعہ خبر رساں ادارہ) افغانستان کی سالنگ ٹنل میں آئل ٹینکر میں ہونے والے دھماکے میں دسیوں افراد جاں بحق ہو گئے جبکہ سرنگ میں موجود کئی گاڑیاں بھی آگ کی لپیٹ میں آگئیں۔

موصولہ رپورٹ کے مطابق حادثے میں اب تک ترسٹھ لاشیں ٹنل سے نکالی جاچکی ہیں اس حادثے میں تینتیس سے زیادہ افراد زخمی ہوگئے۔ عینی شاہدین کا کہنا ہے کہ مرنے والوں میں مردوں کے علاوہ خواتین اور بچے بھی شامل ہیں ۔

افغان حکام کے مطابق حادثے میں جاں بحق ہونے والوں کی تعداد میں اضافے کا خدشہ  ہے، اس رپورٹ کے مطابق دھماکے کے نتیجے میں ٹرک میں آگ لگنے سے سرنگ میں موجود دیگر گاڑیاں بھی آگ کی لپیٹ میں آگئیں ۔ حادثے کے بعد ٹنل کو اگلے حکم تک آمد و رفت کے لیے بند کردیا گیا۔

واضح رہے کہ سالنگ ٹنل افغان صوبے پروان اور صوبے بغلان کی سرحد پر واقع ہے۔