کراچی، سی ٹی ڈی نےکالعدم داعش کے کمانڈر عبد المالک کو گرفتار کرلیا

شیعہ نیوز (پاکستانی شیعہ خبر رساں ادارہ) سی ٹی ڈی نے خفیہ اطلاع پر کراچی کے علاقے کورنگی صنعتی ایریا میں چھاپہ مار کارروائی کے دوران کالعدم تنظیم داعش کے اہم کمانڈر کو گرفتار کرکے اسلحہ برآمد کرنے کا دعویٰ کیا ہے۔

تفصیلات کے مطابق کاؤنٹر ٹیررازم ڈیپارٹمنٹ نے خفیہ اطلاع پر کراچی کے علاقے کورنگی صنعتی ایریا میں چھاپہ مار کارروائی کرتے ہوئے کالعدم تنظیم داعش کے اہم کمانڈر عبدالمالک کو گرفتار کرکے اس کے قبضے سے غیر قانونی 30 بور پستول برآمد کر نے کا دعویٰ کیا ہے۔

یہ خبر بھی پڑھیں سی ٹی ڈی نے راولپنڈی کار بم دھماکے کے ماسٹر مائنڈ عرفان اللہ کو ہلاک کردیا

سی ٹی ڈی حکام کے مطابق گرفتار دہشتگرد نے دوران تفتیش انکشاف کیا کہ وہ 2011ء سے داعش ملا عبدالمنان گروپ سے وابستہ رہا ہے۔ ملزم افغانی ہے اور کافی عرصے سے کراچی میں مقیم ہے، گرفتار ملزم اکثر رمضان کے مہینے میں کراچی سے چندہ اکٹھا کرکے افغانستان میں داعش کو دیتا ہے۔

ملزم نے انکشاف کیا کہ وہ حوالہ ہنڈی کا کام بھی کرتا ہے اور اب تک لاکھوں روپے حوالہ ہنڈی کے ذریعے افغانستان بھیج چکا ہے۔ سی ٹی ڈی حکام کے مطابق گرفتار دہشتگرد کے موبائل فون سے اہم معلومات ملی ہیں، جس کا فرانزک معائنہ کروایا جا رہا ہے، گرفتار دہشتگرد سے مزید تفتیش جاری ہے اور اہم انکشافات متوقع ہیں۔