سابق ایس پی پولیس فرحت عباس ٹارگٹ کلنگ میں شہید
شیعہ نیوز: ملک میں فرقہ وارانہ دہشت گردی کے ذریعے حالات کا رخ بدلنے کی سازش، لاہور میں شیعہ مکتب فکر سے تعلق رکھنے والے سابق ایس پی پولیس فرحت عباس کومسلح دہشت گرد نے ٹارگٹ کلنگ کا نشانہ بناکر شہید کردیا۔
تفصیلات کے مطابق ملت پارک لاہور میں نامعلوم افراد کی فائرنگ سے سابق ایس پی فرحت عباس شہید ہوگئے۔ نجی ٹی وی کے مطابق افسوسناک واقعہ لاہور کے علاقے ملت پارک کے قریب پیش آیا، جہاں نامعلوم مسلح ملزم نے فائرنگ کی، جس سے سابق ایس پی فرحت عباس شہید ہوگئےپولیس کے مطابق فرحت عباس کو گھر کے قریب نشانہ بنایا گیا، فائرنگ کرنے والا حملہ آور اکیلا اور موٹر سائیکل پر سوار تھا۔ سی سی پی او نے واقعے کا نوٹس لیتے ہوئے قتل میں ملوث ملزم کی فوری گرفتاری کا حکم دے دیا ہے۔
پولیس کا کہنا ہے کہ لاہور کے علاقے ملت پارک کی حدود میں دو موٹر سائیکل سواروں نے سابق ایس پی پر فائرنگ کی اور فرار ہوگئے، مقتول اپنے گھر کے باہر بسطامی روڈ پر کھڑے تھے۔ پولیس کی بھاری نفری موقع پر پہنچ گئی اور مقتول فرحت عباس کی لاش کو اسپتال منتقل کر دیا۔
