لبنان کی ترقی کا ضامن، پائیدار امن و استحکام ہے
شیعہ نیوز:شیعہ سپریم اسلامی اسمبلی کے وائس چیئرمین شیخ علی الخطیب نے ایک بیان میں کہا ہے کہ سعودی عرب اور اسلامی جمہوریہ ایران کے مابین باہمی تعاون پر مبنی تعلقات کی بحالی سے تمام مسلمانوں کے دلوں کو خوشی ہوئی ہے اور مسلمانوں کو موجودہ صورتحال سے باہر نکلنے اور امت مسلمہ کے درمیان اتحاد اور معاملات کی اصلاح کی امید دلائی ہے۔
انہوں نے سعودی اور ایران تعلقات کا خیر مقدم کرتے ہوئے مزید کہا کہ یقیناً ان تعلقات کا براہ راست لبنان پر بھی اثر ہو گا۔ لبنان، عرب اور ملت اسلامیہ کی طرح تقسیم، نفرت انگیزی اور فرقہ واریت کا شکار ہے، جو کہ لبنانی عوام کی بدقسمتی کا سبب ہے۔
شیخ الخطیب نے تاکید کی کہ شہری ہونے کی حیثیت سے حقوق کے معاملے میں تمام لبنانی برابر ہیں۔ لبنان کی ترقی کا ضامن، پائیدار امن و استحکام ہے۔
شیعہ سپریم اسلامی اسمبلی کے وائس چیئرمین نے یوم ارض کی مناسبت سے تبریک پیش کرتے ہوئے کہا کہ یوم ارض کے موقع پر اس مقدس سرزمین کے مالکان کو سلام پیش کرتے ہیں کہ جنہوں نے اپنی سرزمین پر قابضین کے ناپاک وجود کو تسلیم نہیں کیا اور ان شہداء کو سلام پیش کرتے ہیں کہ جنہوں نے غاصب اسرائیلی حکومت کے ناجائز قبضے سے فلسطین کی آزادی کیلئے اپنی جانوں کا نذرانہ پیش کیا۔
انہوں نے آخر میں کہا کہ ہم فلسطینی مزاحمت کاروں اور عوام سے مطالبہ کرتے ہیں کہ وہ مسئلہ فلسطین پر ڈٹے رہیں، قابضین کے خلاف مزاحمت جاری رکھیں، فلسطین اور القدس کی فتح اور آزادی تک غاصب صہیونیوں کے ناپاک مقاصد کو ناکام بناتے رہیں۔
