حماس کے ترجمان خالد قدومی کی جماعت اسلامی کے رہنماوں سے ملاقات
شیعہ نیوز: قبلہ اول مسجد اقصیٰ و فلسطین کی آزادی کی جدوجہد اور اسرائیل کی جارحیت و دہشت گردی کے خلاف جاری تحریک مزاحمت ”حماس“ کے ترجمان خالد قدومی نے پیر کو ادارہ نور حق میں امیر جماعت اسلامی کراچی حافظ نعیم الرحمن سے ملاقات کی۔ ملاقات میں جماعت اسلامی کے مرکزی شعبہ امور خارجہ کے ڈائریکٹر آصف لقمان قاضی و دیگر بھی موجود تھے۔ ملاقات میں غزہ کی حالیہ صورتحال کے حوالے سے گفتگو کی گئی۔ خالد قدومی نے جماعت اسلامی کی جانب سے اہل غزہ اور فلسطین کاز کی آگے بڑھ کر حمایت کرنے اور دو ٹوک انداز میں اسرائیل کی مذمت پر شکریہ ادا کیا، کراچی سمیت ملک بھر میں مظاہروں اور اظہار یکجہتی کرنے پر اہل کراچی اور پورے ملک کے عوام کا بھی شکریہ ادا کیا اور کہا کہ اس حمایت اور یکجہتی سے حماس کی تحریک اور مجاہدین کے جذبوں اور حوصلوں کو مہمیز ملی ہے، حماس کی جدو جہد جاری رہے گی۔ حافظ نعیم الرحمن نے خالد قدومی کی ادارہ نور حق آمد پر ان کا بھر پور خیر مقدم کیا اور شکریہ ادا کیا۔ حافظ نعیم الرحمن نے معزز مہمان کو تلوار کا ماڈل بطور تحفہ پیش کیا۔
حافظ نعیم الرحمن نے کہا کہ حماس کی جدوجہد اور اہل غزہ و فلسطین کی لازوال قربانیاں زبردست خراج تحسین کی مستحق ہیں، حماس کی جدوجہد اصولی جدوجہد ہے، قبلہ اول مسجد اقصیٰ اور انبیاء کی سر زمین کی آزادی کی جد وجہد پوری امت کی ذمہ داری ہے، حماس نے پوری امت کی ترجمانی کی ہے اور اسرائیل کے ناپاک وجود کو ایک دن کے لئے بھی قبول نہیں کیا، اسرائیل ایک ناجائز ریاست ہے جسے کسی صورت میں بھی قبول نہیں کیا جا سکتا، بانی پاکستان قائد اعظم محمد علی جناح نے بھی اور دو ٹوک انداز میں واضح کیا تھا کہ اسرائیل کو ہرگز تسلیم نہیں کیا جائے گا، یہ ہی پالیسی ملک کی حقیقی قومی پالیسی ہے، جو لوگ دو ریاستی حل کے نام پر اس مسئلے کو حل کرنا چاہتے ہیں وہ اسرائیل کو تسلیم کرنے کی کوشش کر رہے ہیں جو ملک اور قوم کے ساتھ بھی غداری کر رہے ہیں۔
