پاراچنار سے پشاور جانے والی مسافر کوچ پر ایک مرتبہ پھر فائرنگ

شیعہ نیوز: پاراچنار سے پشاور جانے والی مسافر کوچ پر صدہ بازار کے قریب مسلح افراد نے ایک مرتبہ پھر فائرنگ کردی، جس کے باعث ایک مسافر کی پستول سے جوابی فائرنگ کے بعد حملہ آور فرار ہوگئے، حملے میں ایک مسافر زخمی ہوا۔ پولیس ذرائع کے مطابق پاراچنار سے پشاور جانے والی مسافر کوچ پر صدہ بازار کے قریب بائی پاس روڈ پر مسلح افراد نے فائرنگ کی، جس سے ایک مسافر زخمی ہوگیا اور گاڑی کے شیشے ٹوٹ گئے۔ فائرنگ سے کوچ ٹائر پنکچر ہونے سے رک گئی اور قریب سے مسافروں کو نشانہ بنانے کیلئے مسلح افراد گاڑی کی طرف بڑھ رہے تھے کہ اس دوران ایک مسافر نے پستول سے فائرنگ کی۔

جس سے مسلح افراد فرار ہوگئے اور یوں ایک مسافر کی بہادری کے باعث بے گناہ مسافروں کی جان بچ گئی۔ واقعے کے بعد پولیس جائے وقوعہ پہنچ گئی اور واقعے کی تحقیقات شروع کردیں۔ یاد رہے کہ تین روز قبل بھی ہنگو کے قریب پاراچنار جانے والی کوچ پر مسلح افراد کی فائرنگ سے دو افراد جاں بحق اور چار زخمی ہوگئے تھے۔ گزشتہ کئی ماہ سے پاراچنار آمد و رفت کرنے والی گاڑیوں کو مین روڈ پر دہشت گردی کا نشانہ بنایا جارہا ہے۔