سی ٹی ڈی کا مختلف شہروں سے 22 دہشتگرد گرفتار کرنے کا دعویٰ

شیعہ نیوز: لاہور سمیت پنجاب بھر کے دیگر اضلاع کو بڑی تباہی سے بچا لیا گیا۔ دہشت گردوں کیخلاف سی ٹی ڈی اور حساس اداروں کے کومبنگ آپریشنز جاری ہیں۔ سی ٹی ڈی نے لاہور سمیت پنجاب کے دیگر اضلاع سے بائیس مبینہ دہشتگرد گرفتار کر لیے، دہشت گردوں سے بارودی سامان اور اسلحہ برآمد کر لیا گیا۔ سی ٹی ڈی کے مطابق حالیہ حالات کو مدنظر رکھتے ہوئے سی ٹی ڈی اور حساس اداروں نے کارروائیوں کے دوران لاہور سے چھ دہشت گردوں کو گرفتار کیا۔

سی ٹی ڈی کے مطابق لاہور سے گرفتار دہشت گردوں میں اسامہ، مطیع اللہ، حکیم اللہ، محمد توقیر، محمد عبداللہ اور ہاشم خان شامل ہیں۔ جبکہ باقی دیگر دہشت گردوں کو جہلم، گوجرانوالہ، سرگودھا، بہاولنگر، راولپنڈی اور فیصل آباد سے گرفتار کیا گیا۔ سی ٹی ڈی کا کہنا تھا کہ گرفتار دہشت گرد کالعدم تنظیموں کے اہم رہنما ہیں۔ جن کے قبضے سے اسلحہ اور بارود بھی برآمد کیا گیا۔