علامہ عارف واحدی کی شہر کرمان میں دہشت گردی کے المناک سانحہ کی شدید مذمت
شیعہ نیوز: شیعہ علماء کونسل پاکستان کے مرکزی نائب صدر علامہ عارف حسین واحدی نے پاکستان کے برادر اور ہمسایہ ملک ایران کے شہر کرمان میں میں دہشت گردی کے المناک سانحہ کی شدید مذمت کرتے ہوئے کہا کہ ہم اس حادثے میں شہدا کے لواحقین، ایران کے عوام اور خاص کر رہبر معظم انقلاب آیت اللہ العظمیٰ سید علی خامنہ ای کی خدمت میں تعزیت پیش کرتے ہیں۔
انہوں نے کہا کہ ہم پاکستان کے تمام عوام کی طرف سے ایرانی عوام کے ساتھ یکجہتی کا اظہار کرتے ہیں۔ دہشت گرد اسلام اور امت مسلمہ کے دشمن ہیں۔ عالمی سامراجی طاقتیں خاص کر اسرائیل عالم اسلام میں دہشت گردی پھیلا کر امت کو کمزور کرنے کی گھناؤنی سازش میں ملوث ہے۔
یہ بھی پڑھیں : شفاف الیکشن عوام کا حق ہے جس سے انہیں محروم کیا جا رہا ہے، علامہ باقر زیدی
علامہ عارف واحدی نے مزید کہا کہ اسرائیل اس طرح کے حادثے کرا کے حماس کے مقابلے میں اپنی ذلت آمیز شکست کو چھپانے اور فلسطینی بے گناہ نہتے عوام پر سفاکیت اور درندگی سے توجہ ہٹانے کی کوشش کر رہا ہے مگر مظلوم بے گناہ لوگوں کے خلاف اس طرح کی درندگی سے ان کے سفاکیت مزید عیاں ہوتی ہے۔
انہوں نے کہا کہ پاکستان اور ایران دونوں دہشت گردی سے متاثر ہیں۔ ہماری توقع یہ ہے کہ دونوں ممالک مل کر دہشت گردی کے نیٹ ورک کو توڑنے میں مشترکہ کردار ادا کریں تاکہ پورا خطہ دہشت گردی سے پاک ہو سکے، امید ہے ان دہشت گردوں کے نیٹ ورک کو دنیا کے سامنے جلد بے نقاب کیا جائے گا۔
