دہشت گردوں کی پنجاب میں داخلے کی کوشش ناکام

شیعہ نیوز: ڈیرہ غازی خان کے تھانہ وہوا کی سرحدی چوکی جھنگی پر دہشتگردوں نے حملے کی کوشش کو پنجاب پولیس کے اہلکاروں نے ناکام بنا دیا۔ پولیس نے بتایا کہ ڈیرہ غازی خان کے تھانہ وہوا کی سرحدی چوکی جھنگی پر کالعدم تنظیم کے 8 سے 10 دہشتگردوں نے حملہ آور ہونے کی کوشش کی، چوکی پر تعینات جوانوں نے کیمروں کی مدد سے دہشتگردوں کی نشاندہی کی۔ اپنے ایک بیان میں آئی جی پنجاب ڈاکٹر عثمان انور نے بتایا کہ پولیس کے جانبازوں نے دہشتگردوں کو پسپائی اور بھاگنے پر مجبور کر دیا، صوبے کی تمام سرحدی چوکیوں پر پولیس ٹیمیں شب و روز ہائی الرٹ ہوکر فرائض ادا کر رہی ہیں اور جوانوں کا مورال بلند ہے۔ انہوں نے کہا کہ شہریوں کی جان و مال کے دشمن خطرناک دہشتگردوں کے خاتمے کیلئے پولیس پوری طرح تیار ہے، ملک دشمن عناصر، دہشتگردوں اور سفاک مجرمان کو کسی صورت صوبے میں داخل نہیں ہونے دیا جائیگا، دہشتگردوں کا ہر حملہ ناکام بنایا جائے گا۔