پاکستانی عوام اور مہنگائی، بےروزگاری اور عمران خان کی گرفتاری کے خلاف 26 جولائی کے احتجاج میں بھرپور شرکت کریں،علامہ احمد اقبال رضوی

شیعہ نیوز : وائس چیئرمین مجلس وحدت مسلمین پاکستان علامہ سید احمد اقبال رضوی نے اپنے بیان میں کہا ہے کہ پاکستانی عوام اور کارکنان تحریک تحفظ آئین پاکستان کے 26 جولائی کے احتجاج میں بھرپور شرکت کریں، ملک بھر میں امن وامان کی بگڑتی صورتحال، آئین وقانون کی بالادستی اور تمام بے گناہ قیدیوں کی رہائی کے لیے صدائے احتجاج بلند کریں، مہنگائی کے طوفان نے عوام کا جینا دوبھر کر دیا ہے، بجلی کے بھاری بھرکم بل غریب عوام کے لیے درد سر بن چکے ہیں، عمران خان، بشری بی بی و دیگر تمام سیاسی قیدیوں کو ناحق جیل میں قید کیا گیا ہے، نااہل حکومت حق حکمرانی کھو چکی ہے، یہ ٹولہ جتنی دیر مزید اقتدار میں رہے گا ملکی سیاسی و اقتصادی صورتحال گھمبیر ہوتی جائے گی۔

یہ بھی پڑھیں: کراچی، عباس ٹاؤن بم دھماکے کا ماسٹر مائنڈ عمر فاروق ہلاک

انہوں نے کہا کہ سیاسی رہنماؤں اور سوشل میڈیا سے وابسطہ افراد کا اغوا شرمناک ہے، پی ٹی آئی مرکزی سیکرٹری اطلاعات رؤف حسن کی گرفتاری خلاف قانون اور بلا جواز ہے، جس کی شدید مذمت کرتے ہیں، پاکستان تحریک انصاف کے مرکزی آفس کی بندش انتہائی بھونڈی حرکت ہے اور ہائی کورٹ اسلام آباد کے احکامات کی بھی توہین ہے، سنی اتحاد کونسل کے ارکان قومی اسمبلی کی خریداری کے لیے بڑی بڑی آفرز کی جا رہی ہیں، ارکان اسمبلی کو دباؤ میں لانے اور وفاداریاں تبدیل کرنے کی کوشش کون سی جمہوری روش ہے، جمعہ کے روز پاکستان کے ہر طبقے کو احتجاج میں شریک ہو کر ذمہ دار اور باشعور شہری ہونے کا ثبوت دینا چاہیے۔