غرب اردن میں اسرائیلی فوجیوں پر القسام کے مجاہدین کے کاری وار

شیعہ نیوز: حماس کے فوجی بازو القسام بریگیڈ نے جمعے کی رات اعلان کیا ہے کہ اس کے مجاہدین نے شمالی غرب اردن کے شہر جنین کے مختلف علاقوں میں غاصب اسرائیلی فوجیوں سے سخت مقابلہ کیا اور ان پر کاری وار لگائے ہیں۔

الجزیرہ نے رپورٹ دی ہے کہ القسام بریگیڈ کے مجاہدین نے جنین کیمپ میں داخل ہونے کے راستے میں چھاپہ مار اسرائیلی فوجیوں سے سخت مقابلہ کیا اور ان میں سے بہت سوں کو ہلاک اور زخمی کردیا۔

القسام بریگیڈ کے مجاہدین نے اسی طرح گھات لگاکے کی جانے والی ایک کارروائی میں اسرائیلی فوجیوں کی دو گاڑیوں پر طاقتور بموں سے حملہ کیا۔

یہ بھی پڑھیں : مصر کے شہر طابا میں صیہونیت مخالف کارروائی، 6 صیہونی زخمی

دوسری طرف جہاد اسلامی فلسطین کے فوجی بازو القدس بريگیڈ کی جنین بٹالین نے مختلف سیکٹروں پر اسرائیلی فوج کے پیدل دستوں کا مقابلہ کیا اور ان کی پیشقدمی روک دی۔

القدس بریگیڈ کی جنین بٹالین کے مجاہدین نے اسی طرح مختلف علاقوں میں اسرائیلی فوج کے اسنائپروں کو براہ راست فائرنگ کا نشانہ بنایا ۔

جنین بٹالین کے مجاہدین نے اسی طرح حیفا روڈ پر ایک اسرائیلی فوجی گاڑی کے راستے میں بم کا دھماکہ کیا جس میں متعدد اسرائیلی فوجی زخمی ہوگئے۔