صیہونی حملے میں معمولی نقصان ہوا ہے، ایرانی وزیر دفاع
شیعہ نیوز: ایران کے وزير دفاع نے بتایا ہے کہ ایران کے خلاف حالیہ صیہونی جارحیت میں معمولی نقصان ہوا ہے جس کو ہم نے اپنی علمی توانائی سے کام لےکر فورا ہی دور کردیا
رپورٹ کے مطابق ایران کے وزیر دفاع بریگيڈیئر پائلٹ نصیر زادہ نے پیر کو غیر ایرانی یونیورسٹی طلبا کے نئے تعلیمی سال کے آغاز کی مناسبت سے ایک تقریب سے خطاب میں دنیا کے مختلف علاقوں منجملہ، جنوبی بحیرہ چین، تائیوان کو ورغلانے، بین الاقوامی آبی راستوں اور باب المندب سمیت مختلف خلیجوں میں امریکہ کی موجود گی اور اسی طرح روس یوکرین جنگ میں اس کے کردار اور مداخلتوں کا ذکر کیا۔
ایران کے وزیر دفاع نے اس تقریب سے جس میں تہران میں مقیم مختلف ملکوں کے فوجی اتاشیوں نے بھی شرکت کی، کہا کہ امریکہ کی یہ موجودگی اور اس کی مداخلتیں دنیا میں اس کی خودسرانہ پالیسیوں کا حصہ ہیں۔
یہ بھی پڑھیں : یمن کی مسلح افواج کی شبیہ سازی کے ذریعے تیار کردہ جدید ترین آبدوز کی رونمائی
انھوں نے کہا کہ دنیا کے سبھی مسلم اور غیر مسلم انصاف پسند ملکوں کو اپنی علمی توانائیوں کو اپنے مشترکات پر مرکوز کرنا اور ان کی تقویت کرنا چاہئے۔
ایران کے وزیر دفاع نے کہا کہ غاصب صیہونی حکومت نے تمام بین الاقوامی قوانین کو پامال کیا ہے جو بظاہر انسانی حقوق اور عدل وانصاف کے لئے وضع کئے گئے ہیں۔
انھوں نے کہا کہ ایران کے خلاف غاصب صیہونی حکومت کی حالیہ جارحیت میں معمولی نقصان ہوا جس کو ہم نے فورا ہی اپنی سائنسی توانائی اور دانش سے کام لے کر دور کردیا جبکہ اگر یہ دانش اور ٹیکنالوجی ہمارے پاس نہ ہوتی اور دوسروں کے پاس ہوتی تو وہ ہرگز ہمیں یہ کام نہ کرنے دیتے۔
