قم: دفتر قائد ملت جعفریہ کی جانب سے عزم علماء تنظیمی کنونشن کا انعقاد
کنونشن میں سینکرؤں علماء و طلاب نے شرکت کی اس موقع پر تنظیمی کنونش سے دفتر قائد کے نمائندہ بشارت حسین زاہدی نے خطاب کرتے ہوئے سپاسنامہ پیش کیا اور دفتر قائد کی فعالیت کا ذکر کرتے ہوئے ان رفقاء اراکین نظارت و مجلس عاملہ کی جانب سے طلاب اور زائرین کے لیے جاری خدمات کا ذکر کیا
شیعہ نیوز: شیعہ علماء کونسل پاکستان کے مرکزی سیکرٹری جنرل علامہ ڈاکٹر شبیر حسن میثمی کی سربراہی میں ایران کے 8 روزے دور پر آئے ہوئے وفد نے دفتر قائد ملت جعفریہ پاکستان کی جانب سے منعقدہ عزم علماء و تنظیمی کنونشن میں شرکت کی۔ وفد میں شیعہ علماء کونسل پاکستان کے مرکزی سیکرٹری اطلاعات زاہد علی آخونزادہ، سد اخلاق اختر زیدی، مولانا فیاض حسین مطہری، مولانا ڈاکٹر محمد میثمی، سہیل رضا، سید رفعت عباس زیدی اور رفیق مہدی شامل تھے۔ دفتر قائد قم کے نمائندہ علامہ بشارت حسین زاہدی نے دفتر قائد کے عہدیداروں و علماء کرام کے ہمراہ وفد کا پرتپاک استقبال کیا۔
کنونشن میں سینکرؤں علماء و طلاب نے شرکت کی اس موقع پر تنظیمی کنونش سے دفتر قائد کے نمائندہ بشارت حسین زاہدی نے خطاب کرتے ہوئے سپاسنامہ پیش کیا اور دفتر قائد کی فعالیت کا ذکر کرتے ہوئے ان رفقاء اراکین نظارت و مجلس عاملہ کی جانب سے طلاب اور زائرین کے لیے جاری خدمات کا ذکر کیا۔
یہ بھی پڑھیں: ایم ڈبلیو ایم کے زیر اہتمام تکریم شہداء و حمایت مظلومین جہاں کانفرنس کل سکردو میں ہو گی
بعد ازاں شیعہ علماء کونسل پاکستان کے مرکزی سیکرٹری اطلاعات زاہد علی آخونزادہ نے خطاب کرتے ہوئے قیام پاکستان کے بعد سے تشیع کے تحرک اور تسلسل کے ساتھ پاکستان میں اسلامی اقدار کے احیاء کے لیے کاوشوں، کامیابیوں کے ذیل میں کی گئی خدمات کا ذکر کیا اور 60 کی دھائی میں قائد اول سید محمد دہلوی اعلی اللہ مقامہ کی شیعہ مطالبات کمیٹی کے خدمات، 80 کی دھائی میں قائد علامہ مفتی جعفر حسین اعلیٰ اللہ مقامہ کی تشیع کے اسلامی دائر میں تشخص اور روشن چہرے کو واضح کرنے کے لیے کی گئی خدمات جبکہ بعدازاں قائد شہید علامہ سید عارف حسین الحسینی اعلیٰ اللہ مقامہ کی پاکستان میں اہل اسلام میں اتحاد و وحدت کے لیے کی گئی خدمات اور ان کے تسلسل میں قائد ملت جعفریہ پاکستان علامہ سید ساجد علی نقوی دامت برکاتہ کی کاوشوں سے اتحاد امت کے پلیٹ فارموں کا قیام اور بانئ اتحاد امت مسلمہ کے طور پر کی گئی کاوشوں کے تحت تشیع کو عزت وقار میں اضافہ کا ذکر کرتے ہوئے وطن عزیر پاکستان میں تشیع کو اسلامی دائرے کے وسط میں قرار دیا۔
بعد ازاں بطور مہمان خصوصی خطاب کرتے ہوئے شیعہ علماء کونسل پاکستان کے مرکزی سیکرٹری جنرل علامہ ڈاکٹر شبیر حسن میثمی نے علامہ سید ساجد علی نقوی دامت برکاتہ کی ہدایات کی روشنی میں ملک بھر میں اتحاد امت، عزاءداری سید الشہداء کے تحفظ، زائرین کی مسائل کے حل سمیت دینی خدمات کا تفصیل سے ذکر کیا اور اس ضمن میں کرم پارا چنار میں جنگ سے متاثرہ عوام کی قائد ملت کی جانب سے خدمات و فرقہ واریت کے خلتمے کے لیے موثر اقدامات،گلگت بلتستان میں کامیاب عوامی تحرک، عزاداری پر ایف آئی آرز کے خاتمے کے لیے عملی کاوشوں اور دیگر مسائل کے حل کے لیے سیاسی و مذہبی جد و جہد کو بیان کیا۔
یہ بھی پڑھیں: سانحہ امام بارگاہ علی رضا ؑ کو 21سال بیت گئے، قاتل تاحال آزاد
انہوں نے پاک ایران تعلقات کو ہمسایہ و بردرانہ قرار دیتے ہوئے کہا کہ دونوں ممالک تہذیب و ثقافت اور مذہب کے مظبوط رشتے میں بندھے ہوئے ہیں جسے مذید بہتر بنانے کے لیے علماء کرام اور ایران میں پڑھنے والے طلاب کو مذید کاوشیں کرنی ہوں گی تاکہ دونوں اسلامی ممالک کے دوستی کے رشتوں کو مظبوط سے مظبوط تر بنا سکیں۔ تنظیمی کنونشن کے آغاز میں تلاوت کلام پاک کے بعد حاضرین نے دونوں ممالک پاکستان اور ایران کے قومی ترانوں کا کھڑے ہوکر استقبال کیا۔
