کوئٹہ: علامہ مقصود ڈومکی کی مختلف شخصیات سے ملاقات، برسی امام خمینی میں شرکت کی دعوت

شیعہ نیوز: رہبر کبیر، بانیٔ انقلاب اسلامی حضرت امام خمینی رحمۃ اللہ علیہ کی 36ویں برسی کی مناسبت سے مدرسہ خاتم النبیین (ص) کوئٹہ کے زیر اہتمام ایک اہم فکری و نظریاتی کانفرنس کا انعقاد کیا جا رہا ہے۔ یہ کانفرنس "فلسطین کی تحریکِ آزادی کی جدوجہد میں حضرت امام خمینیؒ کا کردار” کے عنوان سے 2 جون کو منعقد ہوگی۔ اس کانفرنس کے سلسلے میں مجلس وحدت مسلمین پاکستان کے مرکزی سیکرٹری نشر و اشاعت اور مدرسہ خاتم النبیینؐ کوئٹہ کے پرنسپل علامہ مقصود علی ڈومکی نے مختلف مکاتب فکر کے جید علماء، سیاسی و سماجی رہنماؤں کو شرکت کی دعوت دی۔

علامہ مقصود علی ڈومکی نے پاکستان تحریک انصاف بلوچستان کے صوبائی صدر داؤد شاہ کاکڑ، جماعت اسلامی بلوچستان کے رہنماء محمد عارف دمڑ، ادارہ قرآن بلوچستان کے ڈائریکٹر مولانا ذاکر حسین درانی، جمعیت غرباء اہل حدیث بلوچستان کے صوبائی صدر مولانا فضل ربی، ملی یکجہتی کونسل بلوچستان کے رہنماء مولانا عبدالحق ہاشمی، مرکزی مسلم لیگ کے رہنماء حافظ ادریس مغل، مجلس وحدت مسلمین ہزارہ ٹاؤن کے ضلعی صدر سید مہدی ابراہیمی، نیو کوئٹہ پبلک اسکول کے ڈائریکٹر آغا سید عبدالرؤف سجادی اور معروف سماجی شخصیت کیو آر سی ٹرسٹ کے چیئرمین آغا سید عادل شاہ کو کانفرنس میں شرکت کی دعوت دی۔؎

یہ بھی پڑھیں: مسلمان ہوشیار رہیں، ٹرمپ دور حاضر کا دجال ہے، علامہ مرید نقوی

اس موقع پر گفتگو کرتے ہوئے علامہ مقصود علی ڈومکی نے کہا کہ رہبر کبیر حضرت امام خمینیؒ نہ صرف اسلامی انقلاب کے بانی تھے، بلکہ انہوں نے پوری امت مسلمہ کو اتحاد، حریت، اور ظلم کے خلاف قیام کا درس دیا۔ فلسطین کی مظلوم قوم کی حمایت امام خمینیؒ کی زندگی کا بنیادی اصول تھا۔ ان کی فکر آج بھی حریت پسند اقوام کے لیے مشعل راہ ہے۔ امام خمینیؒ نے اسرائیل کو کینسر کا پھوڑا قرار دیا اور امت مسلمہ کو اسرائیلی ظلم اور قبضے کے خلاف متحد ہونے کا درس دیا۔ انہوں نے کہا کہ یہ کانفرنس امام خمینیؒ کی فکر، فلسفۂ وحدت اور مسئلۂ فلسطین کے دفاع کے حوالے سے بیداری کی ایک مؤثر کوشش ہوگی، جس میں مختلف مکاتب فکر کی نمائندہ شخصیات شرکت کرکے اپنے خیالات کا اظہار کریں گی۔