تعلیم کا بجٹ جی ڈی پی کے 5 فیصد کے برابر لایا جائے، ایم ایس ایم

شیعہ نیوز: مصطفوی سٹوڈنٹس موومنٹ کے مرکزی صدر شیخ فرحان عزیز نے استقبالیہ کلمات میں کہا کہ 5 سے 16 سال کی عمر کے کروڑوں بچوں کو سکولوں میں لانے کیلئے تمام وسائل بروئے کار لانا ہوں گے۔ تعلیمی اداروں کو منشیات سے پاک کرنا ہو گا۔ جی ڈی پی کا 5 فیصد تعلیم پر خرچ کیا جائے۔ تعلیم کے بغیر ترقی کا خواب دیکھنا خود کو دھوکا دینے کے مترادف ہے۔

رپورٹ کے مطابق مصطفوی سٹوڈنٹس موومنٹ کے زیراہتمام ایجوکیشن بجٹ سیمینار مرکزی سیکرٹریٹ ماڈل ٹاؤن لاہور منعقد ہوا۔ سیمینار میں مقررین نے تعلیم کے شعبے میں بجٹ کی کمی، موجودہ چیلنجز اور اصلاحات کی ضرورت پر تفصیلی گفتگو کی۔

ماہرین تعلیم، ماہرین معاشیات، سول سوسائٹی کے اراکین، اساتذہ اور طلبہ رہنمائوں نے تعلیمی اصلاحات کیلئے تجاویز بھی پیش کیں۔ سیمینار میں اس ضرورت پر زور دیا گیا کہ تعلیم کا بجٹ کم از کم جی ڈی پی کے 5 فیصد کے برابر لایا جائے۔

یہ بھی پڑھیں : کاؤنٹر ٹیررازم کمیٹی اور ہارڈن دی اسٹیٹ کمیٹی کا اجلاس

سینئر نائب صدر لاہور چیمبر آف کامرس انجینئر خالد عثمان نے کہا کہ تعلیم کے بغیر کوئی بھی ملک ترقی نہیں کر سکتا، مجھے خوشی ہے کہ تحریک منہاج القرآن کا سب سے زیادہ فوکس فروغ تعلیم و تربیت پر ہے۔

آج اس سیمینار میں تعلیم کی اہمیت کو بجٹ کے تناظر میں اجاگر کرنے پر مصطفوی سٹوڈنٹس موومنٹ کے رہنماؤں کو مبارکباد پیش کرتا ہوں۔ لاہور چیمبر آف کامرس مصطفوی سٹوڈنٹ موومنٹ کے تعلیمی بجٹ کو 5فیصد تک بڑھانے کے مطالبے کی حمایت کرتا ہے۔

انہوں نے کہا کہ تعلیم میں سرمایہ کاری سے ہی ملک کی معیشت مستحکم ہو سکتی ہے۔ رجسٹرار منہاج یونیورسٹی لاہور ڈاکٹر خرم شہزاد نے کہا کہ کسی بھی قوم کی سٹریٹجک فائونڈیشن ایجوکیشن ہوتی ہے۔

پرائمری اور ہائر ایجو کیشن میں بیلنس نہیں ہے۔ پچھلے سال کے ایجوکیشن پراجیکٹس ابھی تک مکمل نہیں ہو پائے۔ بلوچستان کا مسئلہ حل کرنا ہے تو ان کو ایجوکیشن سسٹم دیں۔ کروڑوں طلبہ کو پڑھانے کیلئے اساتذہ کی تعداد بہت کم ہے۔ تعلیمی نظام میں اصلاحات کی ضرورت ہے۔ یکساں نظام تعلیم کے بغیر معاشی ترقی ممکن نہیں۔

چیئرمین آل پاکستان پیپر مرچنٹ ایسوسی ایشن احد امین ملک نے تعلیم اور معیشت کے باہمی تعلق پر روشنی ڈالتے ہوئے کہا کہ معیاری تعلیم کے بغیر معاشی ترقی ممکن نہیں۔ انہوں نے تعلیمی بجٹ میں اضافے اور ٹیکنیکل ایجوکیشن کے فروغ کی ضرورت پر زور دیا۔

مصطفوی سٹوڈنٹس موومنٹ کے مرکزی صدر شیخ فرحان عزیز نے استقبالیہ کلمات میں کہا کہ 5 سے 16 سال کی عمر کے کروڑوں بچوں کو سکولوں میں لانے کیلئے تمام وسائل بروئے کار لانا ہوں گے۔ تعلیمی اداروں کو منشیات سے پاک کرنا ہو گا۔ جی ڈی پی کا 5 فیصد تعلیم پر خرچ کیا جائے۔ تعلیم کے بغیر ترقی کا خواب دیکھنا خود کو دھوکا دینے کے مترادف ہے۔ ترقی یافتہ ممالک کی ترقی کا راز تعلیم پر انویسٹمنٹ ہے۔

تعلیمی بجٹ میں اضافہ سے تعلیم کے شعبہ کی حالت بہتر ہوگی، اعلیٰ معیار کی تعلیم کیساتھ جدید تحقیق کو فروغ دینا ضروری ہے۔ سیمینار سے خالد ارشاد صوفی، شاکر محمود اعوان، احمد ابوبکر، اسامہ مشتاق، محسن اقبال، راشد مصطفیٰ و دیگر نے بھی خطاب کیا۔ سیمینار میں مصطفوی سٹوڈنٹس موومنٹ کے مرکزی، صوبائی،ضلعی رہنمائوں اور مختلف یونیورسٹیز و کالجز کے طلبہ نے بڑی تعداد میں شرکت کی۔