آواران، سکیورٹی فورسز کی کارروائی، 3 دہشتگرد ہلاک، فوجی افسر شہید

شیعہ نیوز:بلوچستان کے ضلع آواران میں سکیورٹی فورسز نے انٹیلیجنس بنیاد پر کامیاب آپریشن کیا، جس میں بھارتی سرپرستی میں کام کرنے والے تین دہشتگرد ہلاک ہوگئے، جبکہ فائرنگ کے تبادلے میں میجر سید ربنواز طارق شہید ہوگئے۔ شہید افسر نے جرأت مندی سے قیادت کرتے ہوئے مادرِ وطن پر جان قربان کی۔ پاک فوج کے شعبہ برائے تعلقاتِ عامہ (آئی ایس پی آر) کی جانب سے جاری بیان کے مطابق بلوچستان کے ضلع آواران میں سکیورٹی فورسز نے انٹیلیجنس اطلاعات کی بنیاد پر کارروائی کی، جس میں بھارتی سرپرستی میں سرگرم دہشتگرد تنظیم ”فتنۃ الہندوستان“ کے تین دہشتگردوں کو جہنم واصل کر دیا گیا۔

آئی ایس پی آر کے مطابق آپریشن کے دوران پاک فوج کے جوانوں نے دہشتگردوں کی کمین گاہ کو نشانہ بنایا۔ اس دوران شدید فائرنگ کے تبادلے میں میجر سید ربنواز طارق مادرِ وطن پر قربان ہوگئے۔ شہید افسر کا تعلق مظفرآباد سے ہے اور ان کی عمر 34 برس تھی۔ میجر ربنواز نے بہادری سے قیادت کرتے ہوئے جامِ شہادت نوش کیا۔ ترجمان پاک فوج کا کہنا ہے کہ علاقے میں کلیئرنس اور سینیٹائزیشن آپریشن جاری ہے۔ دہشتگردی کے خاتمے تک سکیورٹی فورسز کا عزم غیر متزلزل ہے۔ شہداء کی قربانیاں ہمارے حوصلے کو مزید مضبوط کرتی ہیں