ہزارہ ٹاون میں بجلی کی غیر اعلانیہ لوڈشیڈنگ اور قلت آب کے مسئلے کا نوٹس لیا جائے، ایم ڈبلیو ایم کوئٹہ

شیعہ نیوز (کوئٹہ) مجلس وحدت مسلمین کوئٹہ ڈویژن سے جاری کردہ ایک بیان میں کہا گیا ہے کہ ہزارہ ٹاون بروری اور اس سے ملحقہ آبادیوں میں پانی کی شدید قلت اور بجلی کی غیر اعلانیہ لوڈ شیڈنگ نے عوام کا جینا اجیرن کر رکھا ہے۔ شدید گرمی میں گھنٹوں بجلی غائب رہتی ہے اور جب بجلی آتی بھی ہے تو بہت کمزور ہونے کی وجہ سے برقی آلات فریج، پنکھا، واٹر پمپ وغیرہ نہیں چل سکتے۔ بڑے پیمانے پر لوگوں کے برقی آلات خراب ہونے کی شکایات آ رہی ہے۔ جسکی وجہ سے عوام کو معاشی طور پر بہت نقصان اُٹھانا پڑ رہا ہے۔ دوسری جانب قلت آب نے عوام کی مشکلات میں اضافہ کر دیا ہے اور گرمی کے اس شدید موسم میں لوگ بوند بوند پانی کو ترس رہے ہیں۔ ان کا کوئی پرسان حال نہیں اور عوام کو ٹینکر مافیا کے رحم و کرم پر چھوڑ دیا گیا ہے۔ جو عوام سے من مانی قیمت وصول کرتے ہیں اور اب کئی دنوں سے ٹینکرز مالکان بھی عوام کو پانی پہنچانے سے معذرت کرتے نظر آتے ہیں۔ ہڑتال اور مختلف قسم کے بہانوں سے اپنی قیمتیں بڑھانے کے چکروں میں رہتے ہیں جبکہ عوامی نمائندے کسی قسم کا کردار ادا کرنے سے مکمل قاصر نظر آتے ہیں اور صرف زبانی جمع خرچ سے کام چلا رہے ہیں۔ بیان میں حکومت سے پر زور مطالبہ کیا گیا کہ محکمہ واسا اور واپڈا کی اس خراب کارکردگی کا فوری نوٹس لیتے ہوئے عوام کو اس کرب کی صورت حال سے نجات دلائی جائے اور عوام کو انکے بنیادی حقوق کے سلسلے میں کردار ادا کیا جائے۔