علماء و ذاکرین کی منبر حسینیؑ اور ہماری ذمہ داریاں کے عنوان سے نشست

شیعہ نیوز: معروف عالم دین علامہ حسن ظفر نقوی کی رہائش گاہ منبر حسینیؑ اور ہماری ذمہ داریاں کے عنوان سے ایک اہم نشست منعقد کی گئی۔ اس نشست میں مجلس ذاکرین امامیہ پاکستان کے علماء اور ذاکرین سمیت دیگر معزز شخصیات نے شرکت کی۔ نشست کا آغاز مغربین کی نماز باجماعت سے ہوا، جس کی امامت علامہ حیات عباس نجفی نے کی۔ بعد ازاں افطار کا اہتمام کیا گیا، جس کے بعد نشست کا باضابطہ آغاز تلاوتِ کلامِ پاک سے ہوا۔ نشست کی صدارت علامہ رضی جعفر نقوی نے کی جبکہ علامہ حسن ظفر نقوی نے میزبان کی حیثیت سے تمام مہمانوں کو خوش آمدید کہا۔

اس موقع پر خطاب کرتے ہوئے علماء کرام اور ذاکرین نے ملکی و عالمی حالات پر روشنی ڈالی اور اس امر پر زور دیا کہ آج کے دور میں منبر حسینیؑ کی ذمہ داری پہلے سے کہیں زیادہ بڑھ گئی ہے۔ مقررین نے کہا کہ منبر سے تعلیمات محمدؐ و آل محمدؑ کو عام کرنا، مومنین کو عالمی سامراجی سازشوں سے آگاہ کرنا اور امت کے درمیان وحدت اور محبت کو فروغ دینا وقت کی اہم ضرورت ہے۔ علماء نے اس بات پر بھی زور دیا کہ اختلافی مسائل کو منبر پر نہ چھیڑا جائے تاکہ اتحاد و یگانگت کو فروغ دیا جا سکے۔ اس کے علاوہ یہ بھی طے پایا کہ نئے ذاکرین کے لیے تربیتی نشستوں کا انعقاد کیا جائے گا تاکہ وہ بہتر انداز میں اپنی ذمہ داریاں ادا کر سکیں۔

یہ بھی پڑھیں: پاراچنار، ایم ڈبلیو ایم کی ضلعی کابینہ کا اعلان اور حلف برداری

اس نشست میں علامہ رضی جعفر نقوی، علامہ حسن ظفر نقوی، علامہ باقر حسین زیدی، علامہ فرقان حیدر عابدی، علامہ نثار احمد قلندری، علامہ حیات عباس نجفی، علامہ حسن رضا رضوی، علامہ ڈاکٹر جواد زیدی، علامہ مبشر حسن، علامہ اظہار حیدر، علامہ سبط حیدر، علامہ علی غنی، علامہ قنبر علی شاہ سمیت دیگر علماء و ذاکرین نے خطاب کیا۔ اس روحانی اور علمی نشست میں شاعر اہل بیتؑ کوثر نقوی، شاعر حسین شاعر، اسد ظفر نقوی اور سلطان رضوی نے اپنے کلام سے محفل کو مزید معنویت بخشی۔ آخر میں علامہ حسن ظفر نقوی نے تمام شرکاء کا شکریہ ادا کرتے ہوئے نشست کے کامیاب انعقاد پر اطمینان کا اظہار کیا۔