عزاداری اور مشی کیخلاف تمام ہتھکنڈے ناکام ہوچکے ہیں، علامہ سبطین سبزواری
شیعہ نیوز:شیعہ علماء کونسل شمالی پنجاب کے صدر علامہ سید سبطین حیدر سبزواری نے کہا ہے کہ ملت جعفریہ نے چہلم حضرت امام حسین علیہ السلام کے جلوسوں میں مثالی نظم و ضبط کا مظاہرہ کرتے ہوئے عزاداری کے دشمن خارجی گروہ اور ریاستی اداروں میں متعصب شرپسندوں کے منہ پر طمانچہ رسید کرکے پیغام دے دیا ہے کہ ملت جعفریہ کو خوفزدہ نہیں کیا جا سکتا، عزاداری اور مشی کیخلاف تمام ہتھکنڈے ناکام ہوچکے ہیں، ایف آئی آرز کے اندراج اور فورتھ شیڈول جیسے منفی ہتھکنڈے ہمیں اہلبیتؑ سے محبت اور عزاداری سید الشہداء سے نہیں ہٹا سکتے۔ چاہے اس کیلئے کتنی بھی قربانیاں کیوں نہ دینی پڑیں۔
عہدیداروں سے گفتگو میں انہوں نے لاہور سمیت مختلف علاقوں میں اربعین واک کیخلاف ایف آئی آرز کے اندراج، جامکے چیمہ ڈسکہ میں شرپسند گروہ کی عزاداروں پر فائرنگ اور ڈیرہ اسمٰعیل خان میں خواتین کی اربعین واک کیخلاف مقدمے کی شدید مذمت کرتے ہوئے کہا ہے کہ ملت جعفریہ کی طرف سے عزاداری کے منظم اور پُرامن جلوس اور مجالس پیغام تھا کہ ہم کسی سے مرعوب ہونیوالے نہیں، عزاداری کرتے رہے ہیں اور آئندہ بھی کریں گے۔ یزید کل بھی مردہ باد تھا، آج بھی ہے اور آئندہ بھی رہے گا۔حکمرانوں کو باور کراتے ہیں کہ عزاداری کی راہ میں کسی قسم کی رکاوٹ قبول نہیں کریں گے۔ ہم زیادہ منظم طریقے سے ریلیاں منعقد کرسکتے ہیں۔ انہوں نے مشی جلوسوں کیخلاف ایف آئی آرز واپس لینے کا مطالبہ کرتے ہوئے پولیس کے اقدامات کو شہری آزادیوں کی خلاف ورزی قرار دیا۔
