اسرائیل سے تعلقات کیلئے سرگرم افراد کے خلاف غداری کامقدمہ درج کیا جائے
شیعہ نیوز (پاکستانی شیعہ خبر رساں ادارہ) اسرائیل سے تعلقات کیلئے سرگرم افراد کے خلاف غداری کامقدمہ درج کیا جائے۔ ان خیالات کا اظہار مجلس وحدت مسلمین ہاکستان کراچی ڈویژن کے صدر علامہ صادق جعفری نے تحریک آزادی القدس کی جانب سے منعقدہ احتجاجی مظاہرے سے خطاب کرتے ہوئے کیا۔
مجلس وحدت مسلمین ہاکستان کراچی ڈویژن کے صدر علامہ صادق جعفری نے تحریک آزادی القدس کی جانب سے تاریخ پاکستان میں پہلی بار پاکستان سے غاصب صہیونی ریاست تک اشیائے خوردونوش کی تجارت اور پاکستان اسرائیلی تجارتی معاہدہ کے خلاف کراچی پریس کلب پرمنعقدہ احتجاجی مظاہرے سے خطاب کرتے ہوئے کہا کہ اسرائیل سے کسی قسم کے تعلقات آئین پاکستان اور ملک سے بغاوت شمار ہوگا۔ جن لوگوں نے اسرائیل کا دورہ کیا ہے اور اسرائیل سے تعلقات کیلئے سرگرم ہیں انکے خلاف غداری کامقدمہ درج کیا جائے ۔
انہوں نے کہا کہ نااہل حکومت کو ڈوب کر مرجانا چاہے دس کلو آٹے کیلئے لوگوں کی جانیں ضائع ہوچکی ہے اور اسرئیل کو کھانے کی اشیاء فراہم کررہے ہیں، جن کے دل میں ذرہ برابر اسلام کی محبت ہو وہ کبھی قبلہ اول اور مظلوم فلسطینیوں کے قاتل اسرائیل کو تسلیم کرنے کا سوچ بھی نہیں سکتے،چند ملک دشمن عناصر کو آئین پاکستان اور اعلی عدلیہ کے ساتھ کھیلنے کی اجازت نہیں دے سکتے۔
انہوں نے مزید کہا کہ مکتب تشیع دفاع اسلام کے ساتھ ساتھ آئین پاکستان کی حفاظت کیلئے ہمیشہ میدان عمل ہے اور رہیںگے،جولوگ دوسروں کو اسرائیل کا ایجنٹ کہتے تھے آج اپنی ہی حکومت میں اسرائیل کے ساتھ رابطوں تعلقات اور ملاقاتوں پر انہیں سانپ سونگھا ہوا ہے۔ نا اہل حکومت سن لے پاکستانی عوام کسی قسم کے آئینی بحران اور اعلیٰ عدلیہ کی توہین کو قبول نہیں کرے گی۔
