پاکستانی شیعہ خبریںہفتہ کی اہم خبریں

پاکستان کے اہم فیصلوں میں ملت جعفریہ کی رائے شامل ہونی چاہیئے

شیعہ نیوز (پاکستانی شیعہ خبر رساں ادارہ) مجلس وحدت مسلمین پاکستان کراچی ڈویژن کے صدر علامہ شیخ محمد صادق جعفری نے کہا ہے کہ نوجوان قوم و ملک کا قیمتی ترین اثاثہ ہیں، بلند پروازی، حوصلوں، امنگوں اور منزل تک پہنچنے کے عزائم کا دوسرا نام نوجوانی ہے، کسی بھی قوم و ملک کی ترقی و زوال، کامیابی و ناکامی اور فتح و شکست میں نوجوانوں کا بنیادی کردار ہوتا ہے، ہر انقلاب چاہے وہ کسی بھی میدان میں ہو، نوجوانوں کا کردار کلیدی ہوتا ہے۔

وحدت ہاؤس انچولی میں ہفتہ وار ورکرز کی تربیتی نشست سے خطاب کرتے ہوئے ایم ڈبلیو ایم کراچی کے صدر علامہ شیخ صادق جعفری نے کہا کہ کسی بھی قوم و ملک کے نوجوان اس قوم و ملک کی ترقی کا بیڑا اپنے سر پر اٹھاتے ہیں تو دنیا کی کوئی طاقت ان کے منزل تک پہنچنے میں حائل نہیں ہوسکتی، نوجوان ہی اصل میں ملک کا سرمایہ ہوتے ہیں اور دنیا میں جتنے بھی انقلابات رونما ہوچکے ہیں، ان کے مشاہدے سے یہ بات ثابت ہوچکی ہے کہ ان کی اس کامیابی میں نوجوانوں کا کلیدی کردار رہا ہے۔ علامہ صادق جعفری کا کہنا تھا کہ آج ہر چھوٹی بڑی تنظیم یا تحریک چاہے سیاسی ہو یا مذہبی، سماجی ہو یا عسکری، ان میں نوجوان ہی پیش پیش ہیں، پاکستان میں موجودہ حالات میں حقیقی آزادی کی تحریک میں بھی نوجوانوں کا بنیادی کردار ہے۔

یہ خبر بھی پڑھیں تکفیریوں کی خوشنودی کی خاطر علامہ شہنشاہ نقوی پر پابندی عائد کی گئی

انہوں نے کہا کہ پاکستان کی تاریخ میں پہلی مرتبہ اس ملک کے عوام اپنی حقیقی آزادی کیلئے اٹھ کھڑے ہوئے ہیں، نوجوان جب اپنے بارے میں نہیں سوچتے ہیں تو استعماری طاقتیں ان قوموں اور ملکوں کیلئے اپنے فیصلے مسلط کرتی ہیں، آج ملک میں حقیقی آزادی کی تحریک عروج پر ہے تو اس کی بنیادی وجہ یہی ہے کہ اس ملک کے فیصلے ہمیشہ واشنگٹن اور لندن میں ہوتے رہے ہیں۔ ان کا مزید کہنا تھا کہ آج مجلس وحدت مسلمین پاکستان عمران خان کے ساتھ حقیقی آزادی کی تحریک میں شامل ہے تو اس کی بنیادی وجہ وہی بیانیہ ہے، جو ہم ایک عرصے سے کہتے آئے ہیں۔

انہوں نے کہا کہ شہید قائد عارف حسین الحسینی نے 1987ء میں قرآن و سنت کانفرنس سے خطاب کرتے ہوئے کہا تھا کہ ہم ایک خوددار قوم ہیں، ہم اپنے فیصلے خود کریں گے، آج عمران خان کی جدوجہد کی بنیاد بھی اسی نظریئے پر چل نکلی تو ایم ڈبلیو ایم نے اس کڑے وقت میں عمران خان کا ساتھ دیا ہے۔ انہوں نے مزید کہا کہ اس ملک کے شہری ہونے کی حیثیت سے ہمارا حق بنتا ہے کہ اہم فیصلوں میں ہماری شرکت ہو اور ان فیصلوں میں ہماری شرکت اس وقت ممکن ہوگی کہ ہم سیاسی طور پر طاقتور ہوجائیں۔

Related Articles

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button