فلسطینی مظلوموں کا کوئی پرسان حال نہیں ہے، علامہ ساجد نقوی

شیعہ نیوز: شیعہ علماء کونسل پاکستان کے سربراہ علامہ سید ساجد علی نقوی کا کہنا ہے کہ فلسطینی مظلوموں کا کوئی پرسان حال نہیں ہے، گھروں، اسپتالوں، اشیائے ضروریہ کی دکانوں کے بعد پناہ گزین کیمپوں پر بھی بمباری کرکے بے گناہ لوگوں کو نشانہ بنایاجارہا ہے، افسوس اقوام متحدہ مذمتی بیانات اور ایام منانے تک ہی محدود رہا، بزرگ شہریوں، خواتین، بچوں کا بے دریغ قتل عام کیا گیا مگر عالمی دنیا کے حکمرانوں کیساتھ اقوام متحدہ جیسا ادارہ بھی ٹس سے مس نہ ہوا۔

علامہ سید ساجد علی نقوی نے کہا کہ منظم اور سفاکانہ انداز میں نسل کشی کا سلسلہ استعماری و صیہونی جاری رکھے ہوئے ہیں، طاقتور ممالک کے حکمران نہ صرف تماشائی بلکہ استعماریت و صیہونیت کے پشت پناہ بنے ہوئے ہیں، ایسی صورتحال میں صرف عالمی ایام کو مختص کرنے کا مقصد گونگلوں سے مٹی جھاڑنے کے مترادف ہے، مظلوم فلسطینی عوام کا حق ہے کہ اقوام متحدہ جیسا عالمی ادارہ اور امت مسلمہ صحیح معنوں میں عملی طور پر فلسطینیوں کے ساتھ کھڑی ہو۔