سربراہ اسلامی تحریک پاکستان علامہ ساجد نقوی کا مسئلہ کشمیر کے حوالے سے مربوط اور جامع پالیسی اختیار کرنے پر زور

شیعہ نیوز : اسلامی تحریک پاکستان کے سربراہ علامہ سید ساجد علی نقوی نے مسئلہ کشمیر کے حوالے سے ایک مربوط، جامع اور نتیجہ خیز پالیسی اختیار کرنے کی ضرورت پر زور دیا ہے۔ ذرائع کے مطابق سید ساجد علی نقوی نے یہ بات راولپنڈی میں کنوینر غلام محمد صفی کی قیادت میں کل جماعتی حریت کانفرنس کی آزاد جموں و کشمیر شاخ کے ایک وفد سے گفتگو کرتے ہوئے کہی۔ انہوں نے کہا کہ مسئلہ کشمیر پاکستان کا اولین مسئلہ ہے اور اس مسئلے کے حوالے سے ہم پہلے بھی کام کرتے رہے ہیں اور آئندہ بھی اپنی کوششیں جاری رکھیں گے۔ انہوں نے کہا کہ 2019ء میں بھارت کے غیر قانونی اقدامات کے بعد یہ بے حد ضروری ہو گیا ہے کہ پاکستان مسئلہ کشمیر کو اجاگر کرنے کے لئے ہر محاذ پر اپنی کوششیں تیز کرے۔ انہوں نے کہا کہ مودی اور اس کی فسطائی حکومت کشمیر کے حوالے سے اپنی ہندوتوا پالیسی پر عمل پیرا ہے۔

علامہ ساجد نقوی نے کہا کہ مقبوضہ جموں و کشمیر اور فلسطین میں جاری مظالم کے حوالے سے مغربی ممالک اور وہاں کے انسانی حقوق کے اداروں کا دوہرا معیار بے نقاب ہو چکا ہے۔ سید ساجد نقوی نے کہا کہ وہ حریت کانفرنس کے شانہ بشانہ کھڑے ہیں اور ہر سطح پر ان کے ساتھ بھرپور تعاون کیا جائے گا۔ حریت وفد نے سید ساجد نقوی کو مقبوضہ جموں و کشمیر کی تازہ ترین صورت حال سے آگاہ کیا۔ اس حوالے سے غلام محمد صفی نے کہا کہ بھارت کشمیر میں اسرائیل کی نو آبادیاتی پالیسی پر عمل پیرا ہے۔ انہوں نے کہا کہ بھارت اور اسرائیل ایک ہی سکے کے دو رخ ہیں اور دونوں طاقتیں کشمیری اور فلسطینی عوام کے جذبہ آزادی کو دبانے کے لئے آپس میں مکمل تعاون کر رہے ہیں۔

غلام محمد صفی نے مسئلہ کشمیر کو اجاگر کرنے کے حوالے سے سید ساجد نقوی کی کوششوں کو سراہا۔ انہوں نے اسماعیل ہانیہ، سید حسن نصراللہ اور فلسطین، لبنان اور کشمیر میں دیگر شہداء کے لئے دعا کی۔ حریت وفد میں فورم کے جنرل سیکریٹری ایڈوکیٹ پرویز احمد شاہ، سید فیض نقشبندی، نثار مرزا اور سید کفایت حسین شامل تھے۔