امریکا، اسرائیل، برطانیہ، فرانس مشرق وسطیٰ میں براہ راست دہشتگردی کر رہے ہیں

۔
شیعہ نیوزـ: مجلس وحدت مسلمین کے اہتمام کراچی میں حمایت فلسطین و دفاع غزہ ریلی نمائش چورنگی سے امریکی قونصلیٹ تک نکالی گئی۔ ریلی میں سینکڑوں کی تعداد میں خواتین، بچوں، بزرگ و جوانوں نے شرکت کی، شرکاء ریلی نے پلے کارڈز و بینرز اٹھائے ہوئے تھے، جس میں لبیک یااقصیٰ، لبیک یا غزہ، امریکا و اسرائیل مردہ باد، قدس کی آزادی تک جنگ رہے گی و دیگر نعرے درج تھے۔ مظاہرین نے امریکی قونصلیٹ کے قریب اسرائیل اور امریکا کے پرچم بھی نظر آتش کئے۔ ریلی میں ایم کیو ایم، جماعت اسلامی، پیپلز پارٹی، امامیہ اسٹوڈنٹس آرگنائزیشن، ذاکرین امامیہ سمیت دیگر سیاسی، مذہبی و سماجی تنظیموں کے رہنماؤں نے شرکت کی۔امریکی قونصلیٹ کے قریب شرکاء ریلی سے خطاب میں علامہ حسن ظفر نقوی نے کہا کہ فلسطین میں جاری اسرائیلی جارحیت انسانیت کا قتل ہے، اسپتال پر حملے اور اسرائیلی جرائم میں امریکا میں برابر کا شریک ہے، فلسطینی عوام پناہ گزین کیمپوں میں بھی محفوظ نہیں، مساجد، چرچ، اسپتالوں، پناہ گزین کیمپوں سمیت رہائشی عمارتوں پر وحشانہ بمباری جاری ہے، امریکا، اسرائیل، برطانیہ، فرانس مشرق وسطیٰ میں براہ راست دہشتگردی کر رہے ہیں۔

علامہ حسن ظفر نقوی نے کہا کہ فلسطین میں موجود مزاحمتی تنظیموں نے صہیونیوں کو مہ توڑ جواب دیا ہے، گریٹر اسرائیل کی طرح ناقابل تسخیر ہونے کا صہیونی خواب کبھی پورا نہیں ہو سکتا، دنیا نے دیکھا امریکی صدر کی اسرائیل موجودگی میں فلسطینی آبادیوں پر فضائی حملے کئے گئے، امریکا، برطانیہ، فرانس نے اسرائیل کی کھل کر مدد کی، اسی طرح مسلم ممالک بھی مظلوم فلسطینیوں کا ساتھ دیں، امریکا عالمی دہشتگرد انسانیت کا دشمن ہے، امریکا کا اسرائیل کے خلاف قرارداد کو ویٹو کرنا مشرق وسطیٰ میں اپنے عزائم کی تکمیل ہے، مسلم ممالک صہیونی ریاست کا سیاسی، سفارتی، سماجی، معاشی بائیکاٹ کریں۔ علامہ حسن ظفر نقوی نے مطالبہ کیا کہ مسلم حکمران اور اقوام متحدہ، عالمی برادری غزہ جانے والی انسانی امداد کی رسائی ممکن بنائیں، ان شاء اللہ شہدائے فلسطین کی قرنیاں غاصب اسرائیلی وجود کے خاتمہ پر رنگ لائیں گی، غزہ اسپتالوں میں ادویات، اجناس اور پانی کے خاتمہ سے مذید انسانی جانیں خطرہ میں ہیں، اسپتال پر وحشیانہ اسرائیلی بمباری جنگی جرم ہے۔

علامہ حسن ظفر نقوی نے کہا کہ اسرائیل کے خلاف عالمی عدالت میں مقدمہ قائم کرنے کی آواز حکومتِ پاکستان اُٹھائے، مصر کا غزہ کے محصورین کو پناہ نہ دینا اسرائیلی خوف ہے، اسرائیلی جارحیت کے خلاف او آئی سی کا خالی مذمتی بیان کافی نہیں، غزہ محاصرے کے فوری خاتمے، مہاجرین کی امداد کیلئے عملی اقدامات کئے جائیں، انبیاء کی سرزمین فلسطین سے غاصب اسرائیل کا خاتمہ ضروری ہے، عالمی برادری فلسطینیوں کی نسل کشی رکوانے میں اپنا کردار کرے۔ ریلی سے خطاب میں ایم کیو ایم کے رہنما روف صدیقی نے کہا کہ 56 اسلامی ممالک غزہ کے مسلمانوں کا ساتھ نہیں دے رہے، مسلم حکمران بزدل ہیں، غزہ میں اسرائیلی جارحیت نہیں روکی گئی تو مدینہ شریف پر یہ صہیونی حملہ کر دیں گے۔انہوں نے کہا کہ امام عالی مقام حضرت امام حسینؑ کا شعار ہے کہ ظلم کے خلاف نہیں اٹھو گے تو بزدل حکمران تم پر مسلط ہو جائیں گے، امریکا، برطانیہ، اسرائیل بے گناہ مسلمانوں کا پوری دنیا میں خون بہا رہے ہیں۔

ریلی سے خطاب میں جماعت اسلامی کراچی کے نائب امیر مسلم پرویز نے کہا کہ ملت پاکستان کے دل اپنے فلسطین مظلوم کے ساتھ دھڑکتے ہیں، امریکا و اسرائیل مظلوموں کا خون بہا رہے ہیں، غزہ فلسطینیوں کی خاظر اپنی جان قربان کرنے سے دریغ نہیں کریں۔ ریلی سے پیپلز پارٹی کے رہنما جاوید ناگوری نے کہا کہ فلسطین کی جنگ ظالم و مظلوم کی جنگ ہے، اسلامی ممالک کو متحد ہونا ہوگا، آج ہم نے مظلوم کی حمایت نہیں کی تو کل ہم پر بھی یہ وقت آئے گا۔ احتجاجی ریلی میں شیعہ علماء کونسل کراچی کے صدر حسن رضا غدیری، سجاد حاتمی، ایم ڈبلیو ایم سندھ کے صدر علامہ باقر عباس زیدی، علی حسین نقوی، علامہ صادق جعفری، ایم کیو ایم کے رہنما عباس جعفری، عارف رضا، فلسطین فاؤنڈیشن کے مرکزی سیکریٹری جرنل ڈاکٹر صابر ابو مریم، آئی ایس او کراچی کے صدر ظفر حیدر، جمیعت اہل حدیث کے رہنما مفتی مرتضیٰ رحمانی، علامہ نثار احمد قلندری، علامہ صادق رضا تقوی، علامہ حسن صلاح الدین سمیت شیعہ تنظیموں، ماتمی انجمنوں کے ذمہ داران، سوشل ایکٹوسٹ آغا شیرازی سمیت دیگر نے شرکت کی۔