امریکہ نے مشرق وسطیٰ کا امن خطرے میں ڈال دیا۔ جیرمی کوربین

شیعہ نیوز (پاکستانی شیعہ خبر رساں ادارہ) برطانیہ کی لیبر پارٹی کے سربراہ جیریمی کوربین نے کہا ہے کہ امریکہ کا مشرق وسطیٰ کے لیے منصوبہ صدی کی ڈیل امن کے لیے خطرہ ہے۔ انہوں نے برطانوی حکومت سے مطالبہ کیا کہ وہ امریکہ کے نام نہاد امن منصوبے کو مسترد کر دے۔

اپنے ایک بیان میں برطانوی اپوزیشن لیڈر نے کہا کہ امریکہ مشرق وسطیٰ میں امن کے قیام میں سنجیدہ نہیں۔ جب تک فلسطینیوں کو ان کے منصفانہ حقوق فراہم نہیں کردیے جاتے اس وقت تک خطے میں امن قائم نہیں ہوسکتا۔

جیریمی کوربین نے برطانوی حکومت سے مطالبہ کیا کہ وہ امریکہ کے صدی کی ڈیل منصوبے کو مسترد کر دے۔

ان کا کہنا تھا کہ امریکی منصوبہ شرمناک اقدام ہے جس میں امن کا کوئی پہلو نہیں۔ یہ صرف اسرائیل کی غیرقانونی سرگرمیوں اور استعماری کارروائیوں کو سند جواز فراہم کرنے کی کوشش ہے۔ ایسا کوئی بھی فارمولا جس میں فلسطینیوں کے بنیادی حقوق کو نظرانداز کیا جائے گا وہ قابل قبول نہیں ہوگا اور نہ ہی اس سے امن قائم ہوسکتا ہے۔