عراقچی کا دہشت گردی کے خلاف مہم میں شام کی حکومت، عوام اور فوج کی بھرپور حمایت پر زور
شیعہ نیوز: ایران کے وزیر خارجہ نے دہشت گردی کے خلاف مہم اور علاقے میں امن واستحکام کے تحفظ ميں شام کی حکومت، عوام اور فوج کی بھر پور حمایت جاری رکھنے پر زور دیا ہے۔
رپورٹ کے مطابق وزیر خارجہ سید عباس عراقچی نے جو ایک سفارتی وفد لے کر دمشق گئے ہیں، اتوار کی رات شام کے صدرصدر بشار اسد سے ملاقات کی۔
ایران کے وزیر خارجہ نے اس ملاقات میں صدر بشار اسد کو رہبر انقلاب اسلامی اور صدر مملکت کا سلام پہنچایا اور دہشت گردی کے خلاف مہم نیز علاقے ميں سلامتی و استحکام کے تحفظ میں شام کی حکومت، عوام اور فوج کی بھرپور حمایت جاری رکھنے کے ایران کے اصولی موقف پر زور دیا۔
یہ بھی پڑھیں : ’جی سی سی‘ سربراہ اجلاس میں غزہ میں فوری اور مستقل جنگ بندی کا مطالبہ
انھوں نے شام میں دہشت گردانہ اقدامات کو علاقے میں جنگ افروزی اور بدامنی پھیلانے میں امریکہ اور صیہونی حکومت کے ساتھ دہشت گردوں کی یک جہتی اور استقامتی محاذ سے صیہونیوں کی شکست کی تلافی کی کوشش قرار دیا۔
ایران کے وزیر خارجہ نے کہا کہ ہمیں یقین ہے کہ ماضی ک طرح اس بار بھی شام دہشت گردوں کی سرکوبی میں کامیاب رہے گا۔
انھوں نے دہشت گرد گروہوں اور غاصب صیہونی حکومت کی جارحیتوں کے مقابلے میں ایران کی جانب سے شام کی حکومت ، عوام اور استقامتی محاذ کی ہمہ گیرحمایت پر زور دیا اور اس کو علاقے نیز سبھی علاقائی ملکوں کی پائیدار سلامتی اور استحکام کے تحفظ پر مبنی ایران کی اسٹریٹیجک پالیسی قرار دیا۔
شام کے صدر بشار اسد نے ایران کے وزیر خارجہ سے اس ملاقات میں رہبر انقلاب اسلامی اور صدر مملکت کی خدمت میں سلام پہنچانے کی درخواست کرتے ہوئے ایران کے عوام اور حکومت کی حمایت کا شکریہ ادا کیا اور علاقے کے ملکوں کی سلامتی اور استحکام کے تحفظ کے حوالے سے ایران کے ذمہ دارانہ موقف کی قدردانی کی۔
انھوں نے کہا کہ اس خطے میں دہشت گردی سے صرف اسلامی ملکوں کے دشمنوں اور ان میں سر فہرست غاصب صیہونی حکومت کو فائدہ پہنچ رہا ہے بنابریں دہشت گردی کو جڑ سے ختم کرنے کے لئے سبھی علاقائی ملکوں کی ہمہ گیر کوششوں کی ضرورت ہے۔
بشار اسد نے اسی کے ساتھ ان نازک حالات میں ایران کے وزیر خارجہ کے دورہ شام کو بہت اہم اور صیہونی حکومت کے مقابلے میں محاذی ملکوں کی ایران کی جانب سے بھرپور حمایت کا مظہر قرار دیا۔
