بہاولنگر عاشورہ جلوس پر حملے کے اصل کردار بے نقاب کیے جائیں
شیعہ نیوز (پاکستانی شیعہ خبر رساں ادارہ) شیعہ علماء کونسل شمالی پنجاب کے صدر علامہ سید سبطین حیدر سبزواری نے بہاولنگر میں عاشورہ محرم کے جلوس پر دستی بموں سے حملے کی شدید مذمت کرتے ہوئے اسے پولیس اور انتظامیہ کی ناکامی قرار دیتے ہوئے یاد دہانی کروائی ہے کہ ہم بار بار نشاندہی کرتے رہے ہیں کہ ریاستی اداروں میں کچھ ناصبی عناصر مجالس اور جلوسوں میں رکاوٹ پیدا کرکے ناصبی عناصر کے سہولت کار بن کر دہشتگردی کے واقعات بھی کرواتے ہیں۔
ان خطوط پر تحقیقات کی جائیں کہ بہاولنگر انتظامیہ خود عزاداری میں رکاوٹیں پیدا کرنے میں ملوث رہی ہے۔ اس حوالے سے شیعہ علماء کونسل کے رہنما چیف سیکرٹری اور ہوم سیکرٹری کو اپنے تحفظات سے آگاہ کر چکے ہیں۔
یہ خبر بھی پڑھیں عزاداران حسینی ؑ نے ذمہ داری کا ثبوت دیتے ہوئے صبر وضبط کا دامن ہاتھ سے نہیں چھوڑا۔رہنما ایم ڈبلیو ایم
علامہ سبطین سبزواری نے کہا کہ عزاداری سید الشہداء پر جان، مال اور وقت کی قربانی ہمارے لیے سعادت ہے۔ علامہ ساجد علی نقوی کا فرمان ہے کہ موت برحق ہے ایڑیاں رگڑ رگڑ کر بستر مرگ پر جان دینے والے سے سعادت مند ہے وہ شخص جو حسینؑ ابن علیؑ کے راستے میں شہید ہو جائے، جبکہ شہید قائد علامہ عارف حسین الحسینی عزاداری کو ملت جعفریہ کی شہ رگ قرار دیتے تھے۔
شیعہ علماء کونسل کے رہنما نے افسوس کا اظہار کیا کہ یزیدی تکفیری خارجی دہشت گردوں نے نواسہ رسول حضرت امام حسین علیہ السلام کے جلوس پر حملہ مسجد سے کرکے شعائراللہ کی بھی توہین کی ہے۔
انہوں نے مطالبہ کیا کہ حملے کے پیچھے کردار بے نقاب کئے جائیں۔ مہرے پکڑنا کافی نہیں۔ دہشتگردی کا پورا نیٹ ورک بے نقاب کیا جائے۔
