اہم پاکستانی خبریں
باجوڑ، سکیورٹی فورسز کی کارروائی، 5 خارجی دہشتگرد ہلاک، 3 جوان شہید
شیعہ نیوز: سیکیورٹی فورسز نے ضلع باجوڑ میں موثر کارروائی کرتے ہوئے 5 خارجی دہشتگردوں کو ہلاک اور 4 کو زخمی کر دیا۔ پاک فوج کے شعبہ تعلقات عامہ آئی ایس پی آر کے مطابق خارجیوں کے ایک گروپ نے پاک افغان بارڈر سے دراندازی کی کوشش کی۔ گزشتہ رات خارجیوں کا گروہ ضلع باجوڑ میں دراندازی کرتا دیکھا گیا، سکیورٹی فورسز نے موثر طریقے سے خارجیوں کی دراندازی کی کوشش ناکام بنا دی۔ سیکیورٹی فورسز کی کارروائی میں فتنہ الخوارج کے 5 خارجی دہشتگرد ہلاک اور 4 زخمی ہو گئے۔
فائرنگ کے شدید تبادلے میں 3 فوجی جوان شہید ہو گئے۔ جام شہادت نوش کرنے والے شہداء میں نائیک عنایت خان، لانس نائیک عمر حیات اور سپاہی وقار خان شامل ہیں۔آئی ایس پی آر کا کہنا ہے کہ پاکستان مسلسل افغان عبوری حکومت کو موثر بارڈر مینجمنٹ کیلئے کہہ چکا ہے، افغان عبوری حکومت خارجیوں کو اپنی سرزمین استعمال کرنے سے روکے۔ توقع ہے افغان عبوری حکومت اس سلسلے میں ضروری اقدامات کرے گی۔
