اپنی زندگی کو درس حسینیت سے مربوط کرنا آج کے نوجوان کی ضرورت ہے، علامہ شبیر میثمی

شیعہ نیوز: مرکزی سیکرٹری جنرل شیعہ علماء کونسل پاکستان علامہ ڈاکٹر شبیر حسن میثمی نے امامیہ اسٹوڈنٹس آرگنائزیشن کراچی کی جانب سے منعقدہ "سالانہ یوم حسین علیہ السلام ” نجم الدین آڈیٹوریم حال کراچی میں شرکت کی اور موجودہ حالات میں نوجوانوں کی ذمہ داریوں پر تفصیلی گفتگو کرتے ہوئے کہا کہ ملک و ملت کی عزت و آبرو، شان اور وقار جوان ہوتے ہیں، آج کے جوان کو ضرورت ہے کہ اپنی زندگی کو درس حسینیت سے ایسے مربوط کریں جس سے کردار حضرت علی اکبر ع کی خوشبو آئے، پیغام حسینیت واضح اور روشن ہے زندگی کے ہر عمل میں کربلائی کردار ادا کرنا ہی حسینیت ہے، کربلا زندگی کے ہر اصول میں رہنماء اصول ہے، لحاظہ میں آج طلباء و طالبات کی اس کاوش کو خراج تحسین پیش کرتا ہوں کہ ایسے اہم موضوع پر اس کانفرنس کا انعقادکیا۔ یہ کانفرنس تمام مکاتب فکر کی ہے، کیونکہ حضرت سید الشہداء امام حسین علیہ السلام کسی خاص مکتب فکر کے پیشوا و امام نہیں بلکہ عالم انسانیت کے رہبر و رہنماء ہیں، آج حریت کی تمام تحریکوں کی رہنماء کربلا ہے اور کربلا ہی یاد خدا کا بھترین وسیلہ ہے۔