بدعنوانی نے ملکی معیشت کو ڈیفالٹ کے دہانے لاکھڑا کیا ہے سید ناصر عباس شیرازی
شیعہ نیوز:بدعنوانی نے ملکی معیشت کو ڈیفالٹ کے دہانے پر لاکھڑا کیا ہے کرپشن کی لعنت نے تعمیر وترقی کی راہیں معدوم کر دی ہیں اور عوام کے لیے تمام شعبہ ہائے زندگی میں منصفانہ انداز سے آگے بڑھنے کے مواقع کم سے کم ہوتے جا رہے ہیں۔ ان خیالات کا اظہار سید ناصر عباس شیرازی مرکزی جنرل سیکرٹری مجلس وحدت مسلمین نے کرپشن کے عالمی دن کے موقع پر میڈیا سیل سے جاری بیان میں کیا انہوں نے کہا کہ بدقسمتی سے پچہتر سال میں ملک پر حکومت کرنے والوں نے ملک سے کرپشن کے خاتمے کے لیے خاطر خواہ اقدامات نہیں اٹھائے بلکہ ایسا ماحول پیدا کر دیا گیا ہے جس سے پاکستانی معاشرے میں کرپشن کے لیے قبولیت کے جذبات پروان چڑھ چکے ہیں ۔ ملک میں کرپشن سے کھربوں روپے لوٹنے والے ہی قانوں ساز اداروں میں بیٹھے احتساب کے خلاف قانوں سازیاں کر رہے ہیں ۔
انہوں نے کہا کہ ہمارے ملک میں وسائلِ اور دولت کی تقسیم انتہائی غیر منصفانہ ہے جس سے غریب طبقہ سب سے زیادہ متاثر ہو رہا ہے پاکستان میں دنیا کے دیگر ممالک سے کئی گنا زیادہ کرپشن ہے اور بدعنوانی میں ملوث طاقتور لوگ قانون کی پکڑ سے ہمیشہ محفوظ رہتے ہیں جب تک بااثر بدعنوان افراد پر ہاتھ نہیں ڈالا جائے گا ملک سے کرپشن کا خاتمہ ممکن نہیں اور یہ ناسور ملکی بنیادوں کو کھوکھلا کرتا رہے گا لہذا ضرورت اس امر کی ہے کہ کرپشن کے خلاف صرف خوبصورت نعروں سے نہیں بلکہ سختی کے ساتھ عملی اقدامات اٹھانے سے ہی نجات مل سکتی ہے۔
