ڈیرہ اسماعیل خان، جامعتہ النجف کا سالانہ دین شناسی شارٹ کورس

شیعہ نیوز: ڈیرہ اسماعیل خان میں جامعتہ النجف کوٹلی امام حسینؑ کے سالانہ دین شناسی شارٹ کورس کی اختتامی تقریب کا انعقاد کیا گیا، جس میں جامعتہ النجف کے مدرسین اور شارٹ کورس میں شرکت کرنے والے طلاب نے کثیر تعداد میں شرکت کی۔ دین شناسی شارٹ کورس میں شرکت کرنے والے طلاب کو ابتدائی دینی و فقہی مسائل، درس اخلاق اور دینی تعلیم و تربیت کے دورس دیئے گئے اور ان کی شارٹ کورس میں کارکردگی کو جانچنے کے لئے امتحان لیا گیا اور امتحان میں نمایاں پوزیشن حاصل کرنے والے طلاب کرام کی حوصلہ افزائی کیلئے انعامات سے نوازا گیا۔

طلاب نے شارٹ کورس پروگرام میں شرکت اور انعامات کی تقریب پر خوشی کا اظہار اور اساتذہ کرام کا شکر ادا کرتے ہوئے کہا کہ اساتذہ کی محنت اور شفقت سے بہت کچھ سیکھنے کا موقع ملا اور ان شاء اللہ آئندہ سال بھی اس شارٹ کورس میں شرکت کرنے کی کوشش کرینگے۔ تقریب کے موقع پر یوم پاکستان 14 اگست کی مناسبت سے قومی و ملی نغمے پیش کئے گئے اور جامعتہ النجف کوٹلی امام حسینؑ میں قومی پرچم کی پرچم کشائی کی بھی گئی، ملک قوم کی سلامتی کےلئے خصوصی دعا کی گئی۔