امریکی سازشوں کے باوجود خطے میں مقاومت مضبوط ہورہی ہے، عبدالملک الحوثی

شیعہ نیوز: یمنی تنظیم انصاراللہ سربراہ نے خطے میں امریکی سازشوں کو ناکام قرار دیتے ہوئے کہا ہے کہ اسرائیل کے خلاف مقاومت مزید مضبوط ہورہی ہے۔

مہر خبررساں ایجنسی نے رپورٹ دی ہے کہ یمنی مقاومتی تنظیم انصار اللہ کے سربراہ سید عبدالملک بدرالدین الحوثی نے یوم القدس کے موقع پر صنعا اور دیگر صوبوں میں یمنی عوام کی ریلیوں میں بھرپور شرکت کو سراہا۔

انہوں نے کہا کہ یمنی عوام کی فلسطین اور اسلامی مقدسات کی حمایت میں پرجوش شرکت مسلم اقوام کے لیے ایک مثالی نمونہ ہے۔

یہ بھی پڑھیں : نیتن یاہو نے موساد کو غزہ کے باشندوں کی جبری بے دخلی کا منصوبہ سونپ دیا، ذرائع کا انکشاف

الحوثی نے مزید کہا کہ ہماری قوم کا فلسطین کے حوالے سے مؤقف مکمل واضح اور جامع ہے، جو ہر میدان اور ہر سطح پر نمایاں طور پر ظاہر ہوتا ہے۔

انصاراللہ کے رہنما نے یمنی عوام کی مزاحمت پر روشنی ڈالتے ہوئے کہا کہ ہماری قوم نے تمام تر دباؤ اور ظلم کے خلاف استقامت دکھائی ہے اور اللہ پر بھروسہ کرتے ہوئے جہاد کے راستے میں بڑے قدم اٹھائے ہیں۔

انہوں نے کہا کہ یمنی عوام کی ریلیوں میں وسیع شرکت امریکہ کے لیے ایک واضح پیغام ہے کہ یہ پورے یمن کے تمام طبقات کی مشترکہ آواز ہے۔

الحوثی نے امریکہ کی حالیہ سفارتی سرگرمیوں کی طرف اشارہ کرتے ہوئے کہا کہ امریکہ اپنی سفارتی سازشوں کے ذریعے فلسطین کو مکمل طور پر تنہا کرنے کی کوشش کر رہا ہے۔

انہوں نے مزید کہا کہ امریکہ خطے میں اسرائیل کے خلاف ہر ممکن مزاحمت کو ختم کرنے کی راہ ہموار کررہا ہے۔

الحوثی نے ایران، عراق، اور لبنان جیسے فلسطین کے حامی ممالک پر امریکی دباؤ کی مذمت کرتے ہوئے کہا کہ لبنان میں اسلامی مزاحمت اپنی پوزیشن کو مزید مضبوط کر رہی ہے۔

انہوں نے اسرائیل کے شام پر حملوں پر عالمی برادری کی خاموشی کو تنقید کا نشانہ بنایا۔

الحوثی نے کہا کہ امریکہ ایک طرف اسرائیل کی غزہ میں جنگی جرائم کی کھل کر حمایت کررہا ہے اور دوسری جانب یمن میں شہری تنصیبات کو نشانہ بنا کر انسانی حقوق کی دھجیاں اڑا رہا ہے۔