اردوگان کی منافقت، اسرائیل کے لئے ایندھن اور غذا جبکہ غزہ کے لئے صرف دعا، ترکی رکن پارلیمنٹ
شیعہ نیوز: ترکی رکن پارلیمنٹ نے صدر اردوگان کی منافقت پر تنقید کرتے ہوئے کہا ہے کہ غزہ کے لئے صرف دعا کرنے والی حکومت اسرائیل کے لیے غذا، ایندھن اور دیگر ضروریات کی چیزیں بھیج رہی ہے۔
رپورٹ کے مطابق ترکی پارلیمان کے ایک رکن نے صدر اردوگان کی حکومت پر سخت تنقید کرتے ہوئے غزہ پر اسرائیلی مظالم کے مقابلے میں ترکی کے عملی کردار پر سوالات اٹھائے ہیں۔
پارلیمان میں خطاب کرتے ہوئے مذکورہ رکن نے کہا کہ آج یہاں غزہ کے لیے دکھ اور افسوس کا اظہار کیا گیا، مگر حقیقت یہ ہے کہ جن اسرائیلی پائلٹس نے غزہ کو بمباری کا نشانہ بنایا، وہ قونیہ میں تربیت یافتہ ہیں۔
یہ بھی پڑھیں : مدرسہ میں مہتمم کی پٹائی سے مرنے والے بچے کے کلاس فیلو کا انٹرویو
انہوں نے مزید کہا کہ اسرائیلی جنگی طیاروں کے لیے ایندھن اسکندرون بندرگاہ سے جاتا ہے، ان کے فوجیوں کی خوراک آلانیا سے فراہم کی جاتی ہے اور پانی ماناوگات سے آتا ہے۔ ترکی اور اسرائیل کے درمیان تجارتی تعلقات بدستور قائم ہیں، اور ان میں سب سے نمایاں فولاد اور لوہے کی تجارت ہے۔
ترکی رکن نے انکشاف کیا کہ بعض ہتھیار بھی بالواسطہ طور پر ترکی سے اسرائیل کو فراہم کیے جا رہے ہیں۔ ہم یوکرائن اور آذربائیجان کو ڈرونز فراہم کرتے ہیں، لیکن فلسطین کے لیے صرف دعاؤں پر اکتفا کرتے ہیں۔
اس بیان نے ترکی کے سیاسی حلقوں اور عوام میں ایک نئی بحث چھیڑ دی ہے، جہاں حکومت کے اسرائیل سے جاری تجارتی تعلقات اور دوغلی پالیسیوں پر سوال اٹھائے جا رہے ہیں، خاص طور پر ایسے وقت میں جب غزہ بدترین انسانی بحران سے گزر رہا ہے۔
