فلسطینیوں سے اظہار یکجہتی، پیپلزپارٹی کا 18 اکتوبر کوتعزیتی اجلاس کا اعلان
شیعہ نیوز: پیپلز پارٹی کراچی ڈویژن کے صدر سعید غنی نے کہا کہ 18 اکتوبر کو بلاول ہائوس کے سامنے تعزیتی اجلاس ہوگا جس میں بلاول بھٹو زرداری خطاب کرینگے۔ سعید غنی نے کہا کہ تعزیتی اجلاس میں چیئرمین بلاول بھٹو اور پاکستان میں فلسطینی سفیر شرکت کرینگے۔ فلسطینی شہدا کو خراج عقیدت پیش کرینگے۔ کارساز پرسانحہ میں شہید ہونے والوں کو یاد رکھا جائے گا۔ لیاری میں جلسے سے خطاب کرتے ہوئے سعید غنی نے کہا کہ 2018ء کے انتخابات کے دوران لیاری میں پی پی کے ووٹ پر ڈاکہ ڈالا گیا لیکن بلدیاتی الیکشن میں اسکا بھرپور بدلہ لیا۔ آئندہ انتخابات میں اسی طرح بلاول بھٹو زرداری کو لیاری سےجتوانا ہے اور مخالفین کو بتانا چاہتے ہیں کہ لیاری پی پی کا ہے اور رہے گا۔
سعید غنی نے کہا کہ ماضی میں کراچی میں بے تہاشہ خون بہایا گیا۔ اطلاعات ہیں ایم کیو ایم کے دہشتگرد ایک بارپھر کراچی میں وہی خون کی ہولی کھیلنےکا پلان کر رہے ہیں۔ انہوں نے کہا کہ آئندہ انتخابات میں پی پی سمیت تمام جماعتوں کے امیدواروں کو یکساں موقع ملنا چاہیے۔ پی پی اپنے مینڈیٹ اور ووٹ کو چوری ہونے نہیں دے گی۔ پی ٹی آئی کو بھی اگلے انتخابات میں حصہ لینے کی اجازت ہونی چاہیئے۔ سعید غنی کا مزید کہنا تھا کہ تمام جماعتوں کو لیول پلیئنگ فیلڈ دی جائے۔ صاف شفاف انتخابات ہونے چاہئیں، پی ٹی آئی، ایم کیو ایم جماعت اسلامی کے ساتھ پی پی کو بھی بھرپور طریقے سے انتخابات کی اجازت ہونی چاہئے۔
